मुंबई : समृद्धी महामार्गावर निष्काळजीपणे वाहन चालवून होणारे अपघात महामार्ग पोलीसांची डोकेदूखी ठरली आहे. वाहन चालकांकडून वाहतुक नियमांची सर्रास पायमल्ली होत असून, वाहनांचे सदोष टायर वापरल्याने सुद्धा समृद्धी महामार्गांवर अपघात होत असल्याचे लक्षात आले आहे.

त्यामूळे परिवहन आयुक्त विवेक भिमनवार यांनी पुढाकार घेत शिर्डी, औरंगाबाद, कारंजा आणि नागपुर या चार इंटरचेंजेंस तयार करून संगणक आधारीत सायरन प्रणाली कार्यान्वीत केली आहे. तर नागपुर ते शिर्डी यादरम्यान 7 पथकांची नियुक्ती करून 24 तास चालकांचे समुपदेशन करण्याच्या सुचना दिल्या आहे.

समृद्धी महामार्गावर ताशी 120 वेगाची मर्यादा आहे. वाहनांची समृद्धी महामार्गावरील एंट्री आणि एक्झीटवर तपासनी केली जाणार असून, त्यादरम्यान वाहनाची एव्हरेज स्पीड तसापली जाणार आहे. एव्हरेज स्पीड पेक्षा जास्त आढळून आल्यास, एक्झीट टोल नाक्यावर आॅटोमॅटीक सायरन वाजणार असून, वाहतुक नियमांची पायमल्ली करणाऱ्या अशा वाहन चालकांचे त्याच ठिकाणी थांबवून समुपदेशन केले जाणार आहे.

त्याशिवाय ओव्हरस्पीड, लेनकटींग, नो पार्किंग, रिफलेक्टर संदर्भातील नियम भंग करणाऱ्या वाहनांचे त्याचवेळी आॅऩलाईन पद्धतीने वाहन क्रमांक ब्लाॅक केल्या जाणार असून असे वाहन टोल नाके ओलांडतांना त्यांना थांबवून सुमारे 15 मिनीट चालकांचे समुपदेशन केले जाणार आहे.

संगणक प्रणाली 17 एप्रिल पासून समृद्धी महामार्गावर कार्यान्वीत झाली असून, दोन दिवसात 294 वाहनांची तपासणी करण्यात आली आहे. त्यामध्ये एंन्ट्री पाँईंन्टवर वाहनांच्या टायरची तपासणी केल्यानंतर दोन दिवसात 16 वाहनांना समृद्धी महामार्गावर प्रवेश नाकारण्यात आला आहे.

रिफलेक्टर नसलेल्या 30 वाहनांना आरटीओ पथकांच्या मार्फेत रिफलेक्टर लावण्यात आले आहे. 38 वाहनांची वेग मर्यादा ताशी 120 पेक्षा जास्त आढळून आली आहे. त्याचप्रमाणे ओव्हरस्पीड 3 वाहन, लेनकटींग 8 वाहन दोषी आढळून आले असल्याची माहिती परिवहन विभागाने दिली आहे.

समृद्धी मार्गावरील अपघाताची आकडेवारी (11 डिसेंबर ते 31 मार्च )

महामार्ग पोलीस क्षेत्र - मृत्यु - अपघात

• खुर्सापुर - 0 - 6

• जाम - 1 - 27

• धामनगांव रेल्वे - 4 - 28

• आमनी - 3 - 45

• मलकापुर - 11 - 42

• औरंगाबाद - 5 - 48

• जालना - 2 - 50

• भाबलेश्वर - 2 - 7

• एकूण - 28 - 253