मुंबई: फोर्ट येथील हिमालय पूल कोसळल्यानंतर महानगर पालिकेने सर्व पुलांचे पुन्हा ऑडिट करण्याचा करण्याचा निर्णय घेतला होता. त्यामुळे दुरुस्ती सुरु असलेल्या पुलांचेही ऑडिट करण्यात आले. त्यामुळे पुलांच्या दुरुस्तीत वाढ होऊन खर्चातही वाढ झाली आहे. दादर, माहिम परिसरातील सहा पुलांच्या दुरुस्तीचा खर्च पाच कोटी 23 लाखांनी वाढला आहे. यात पुलांची संरक्षक भिंत काढून त्या ठिकाणी कमी वजनाची मेंटल क्रॅश बॅरिअर बांधण्यात येणार आहे.

पुलांवर अतिरिक्त बांधकामाचा भार वाढल्याने हिमालय आणि अंधेरी येथील गोखले पुलाची दुर्घटना घडल्याचा निष्कर्ष चौकशी समितीने काढला होता. हिमालय पुलाच्या दुर्घटनेनंतर पालिकेने शहरातील सर्व पुलांचे पुन्हा ऑडिट करण्यात आले. त्यातही सल्लागारांनी पुलांवरील भार कमी करण्याची शिफारस केली आहे. त्यानुसार पुलावर झालेले कॉक्रिटीकरण कमी करणे त्या बदल्यात डांबरीकरण करणे तसेच सुरक्षा भिंत काढून त्या बॅरीअर बांधण्याची शिफारस करण्यात आली आहे.

हेही वाचा- रिलायन्स कार्यालयावर आज शेतकरी संघटनांचा मोर्चा; बच्चू कडू, राजू शेट्टी, जयंत पाटील सहभागी होणार
 

हे ऑडिट होण्यापूर्वी पालिकेने दादर आणि माहिम परिसरातील सहा पुलांच्या दुरुस्तीसाठी कंत्राट दिले होते. त्यासाठी आठ कोटी 90 लाख रुपये खर्च करणार होती. मात्र,आता वाढलेल्या कामामुळे त्यात पाच कोटी 23 लाखांची भर पडली आहे.  या सहा पुलांच्या दुरुस्तीसाठी आता 14 कोटी 84 लाख रुपये खर्च करण्यात येणार आहे, असा दावा महापालिका प्रशासनाने केला आहे.

मुंबई विभागातल्या ताज्या बातम्या वाचण्यासाठी येथे क्लिक करा.

या वाढीव खर्चाला मंजूरी मिळण्यासाठी महानगर पालिकेनं ऑक्टोबर महिन्यात झालेल्या स्थायी समितीच्या बैठकीत हा प्रस्ताव मांडला होता. मात्र तेव्हा सदस्यांनी आक्षेप नोंदवले होते. त्या आक्षेपांवर प्रशासनाने खुलासा करुन पुन्हा प्रस्ताव मांडला आहे. 23 तारखेला होणाऱ्या स्थायी समितीच्या बैठकीत या प्रस्तावावर चर्चा होणार आहे.

--------------------------------

(संपादन- पूजा विचारे)

cost repairing price six bridges Dadar Mahim increased 5 crore