Mumbai Crime: काळी जादू व जादू टोणा अवगत असल्याच्या बहाण्याने  महिलेवर बलात्कार करणाऱ्या ढोंगी बाबाला नयानागर पोलिसांनी अटक केली आहे.

ढोंगी बाबाने याचप्रकारे आणखी काही महिलांवर अत्याचार केले असल्याची शक्यता पोलिसांकडून व्यक्त केली आहे. संतोष पोद्दार उर्फ विनोद पंडित असे या ढोंगी बाबाचे नाव आहे.

विनोद पंडित याने  हस्तरेखातज्ञ असल्याचे समाजमाध्यमावर पेज तयार केले होते. वैवाहिक समस्या तसेच नोकरीच्या समस्या पत्रिका बघून सोडवल्या जातील असे त्यात नमूद केले होते. मिरा रोड मध्येच त्याने कार्यालयही थाटले होते. 

मुंबईत राहणाऱ्या एका महिला नोकरीच्या शोधात होती.   फेसबुक वरील जाहिरात वाचून ती पंडित यांच्याकडे  गेली.  त्याने तिचा विश्वास संपादन केला आणि तंत्रविद्या तसेच काळी जादू करण्याच्या नावाने  तिच्याशी बळजबरीने शारीरिक संबंध बनवले. महिलेला नोकरीही लागली व महिलेचे लग्नही  झाले. त्यामुळे तिने बाबाशी संबंध कमी केले.

परंतु एका वर्षाने तिच्या लग्नात वैवाहिक समस्या निर्माण झाल्याने पुन्हा ती बाबाला भेटली. यावेळी बाबाने तांत्रिक विद्येच्या नावाने तिच्यावर नैसर्गिक तसेच अनैसर्गिक लैंगिक अत्याचार केले तसेच तिची अश्लील छायाचित्रेही काढली. 

या छायाचित्रांच्या आधारे तो तिला ब्लॅकमेल करू लागला. अशा प्रकारे बाबाने तीन वर्ष तीच्यावर लैंगिक अत्याचार केल्यानंतर  कंटाळून महिलेने नया नगर पोलीस ठाण्यात तक्रार दाखल केली.  पोलिसांनी ढोंगी बाबावर  बलात्कार तसेच महाराष्ट्र नरबळी आणी  अघोरी प्रथा उच्चाटन अधिनियमानुसार गुन्हा दाखल करून त्याला अटक केली.

ढोंगी बाबाच्या मोबाईल मध्ये आणखी काही  महिलांची अश्लील छायाचित्रे पोलिसांना  आढळल्याने त्याने  आणखी काही महिलांवर याचप्रकारे अत्याचार केले असल्याची शक्यता नयानगर पोलिसांनी व्यक्त केली.

२०१९ मध्ये देखील बाब विरोधात नया नगर पोलीस ठाण्यात बलात्काराचा गुन्हा दाखल करण्यात आला होता.