डोंबिवली - चोरट्यांनी डोंबिवलीतील औषध विक्रीची दुकाने देखील लक्ष केली असून मेडिकलमधील चोऱ्यांचे प्रमाण वाढले आहे. चोरटे मालमत्तेचे तसेच दुकानातील औषधांचीही नासधूस करत असल्याने मेडिकल चालक हैराण झाले आहे. महिनाभराच्या कालावधीत डोंबिवलीतील सात औषधांची दुकाने चोरट्यांनी फोडली असल्याची घटना उघडकीस आली आहे. याप्रकरणी डोंबिवली केमिस्ट असोसिएशनचे अध्यक्ष दिलीप देशमुख, नीलेश वाणी, दुधनाथ यादव यांसह इतर पदाधिकाऱ्यांनी मानपाडा पोलीस ठाण्याचे वरिष्ठ पोलीस निरिक्षक शेखर बागडे यांची सोमवारी भेट घेतली. मानपाडा पोलीस हद्दीतील एस. एस. मेडिकल, लोढा हेवन मधील निळजे मेडिकल, जनेरिकार्ट, संगीतावाडी मधील सिद्धी मेडिकल, गेटवेल मेडिकल, स्वामी मेडिकल, नांदिवली रस्त्यावरील विजया मेडिकल ही दुकाने चोरट्यांनी फोडली आहेत.

मेडिकल मधील मालमत्तेचे चोरटे नुकसान करतात. त्यासोबतच गल्ल्यातील रोख रक्कम, खाण्याच्या आवश्यक वस्तू, काही औषधे चोरट्यांनी चोरुन नेली आहेत. या चोरीला आळा घालण्यासाठी मेडिकल दुकाने असलेल्या परिसरात पोलिसांची गस्त वाढवावी अशी मागणी यावेळी संघटनेने केली. चोरट्यांना पकडण्यासाठी एक विशेष तपास पथक स्थापन करावे. मेडिकलमधील सीसीटिव्ही मध्ये चोरटे कैद झाले असल्याने त्यांचा लवकर शोध घेतला जावा, मेडिकलमध्ये एक व्हिजीट बूक ठेवण्यात यावे अशी मागणी यावेळी संघटने कडून करण्यात आली.