मुंबई : राज्यातील सर्वधर्मीयांची प्रार्थनास्थळे (Religious place) सुरक्षेचे नियम पाळून आजपासून सुरू करण्यात आली आहेत. याच निमित्ताने पाणीपुरवठा व स्वच्छता राज्यमंत्री संजय बनसोडे (sanjay bansode) यांनी दादर येथील चैत्यभूमीला (dadar chaityabhumi) आज सकाळी भेट दिली आणि भारतरत्न डॉ. बाबासाहेब आंबेडकर (dr babasaheb ambedkar) यांना अभिवादन केले.

या वेळी भारतीय बौद्ध महासंघ आणि समता सैनिक दलाचे प्रतिनिधी प्रदीप कांबळे, डॉ. बाबासाहेब आंबेडकर महापरिनिर्वाण दिन समन्वय समितीचे नागसेन कांबळे, शिरीष चिकलकर, सुबोध भारत, सुनील बनसोडे, रामदास शिंदे, सतीश सूर्यवंशी उपस्थित होते. कोविडमुळे खबरदारीचा उपाय म्हणून राज्यातील सर्व प्रार्थनास्थळे बंद ठेवण्यात आली होती.

आजपासून प्रार्थनास्थळे भाविकांना दर्शनासाठी उघडण्यात आली असली, तरी भक्तांनी आवश्यक ती खबरदारी घेत राज्य शासनाला सहकार्य करावे. कोविडचा धोका अजूनही पूर्णपणे संपलेला नसल्याने तोंडाला मास्क लावणे, सॅनिटायजरचा वापर करणे आणि सार्वजनिक ठिकाणी गर्दी न करणे या गोष्टींचे पालन करणे आवश्यक आहे, असे त्यांनी सांगितले.