वाशी ः तालुक्यात शुक्रवारी व शनिवारी पहाटेपर्यंत जोरदार पाऊस झाला. तालुक्यातील तिन्ही महसूल मंडळात अतिवृष्टी आहे. सकाळी आठपर्यंत संपलेल्या गेल्या 24 तासांत तालुक्यात सरासरी 78 मिलीमीटर पाऊस नोंदला गेला.

खरीप हंगामाचे उत्पन्न शेतकऱ्यांच्या हातून गेल्यानतंर तालुक्यात परतीच्या पावसाने जोरदार हजेरी लावली. शुक्रवारी रात्रीपासून शनिवारच्या पहाटेपर्यं कमी -अधिक प्रमाणात पाऊस झाला. या पावसामुळे रब्बी हंगाम पदरात पडण्याच्या आशा पल्लवीत झाल्या असल्याने शेतकऱ्यांमध्ये आनंदाचे वातावरण आहे. वाशी महसूल मंडळात ८२, पारगाव मंडळात ७० तर तेरखेडा मंडळात ८२ मिलीमीटर पाऊस नोंदला गेला.

तालुक्यात सध्या सोयाबीन पिकाच्या काढणीची कामे सुरु आहेत. सोयाबीन पिकाच्या काढणीसाठी मजूर मिळत नसल्याने काढणी कशी करावी या चिंतेत शेतकरी असतानाच शुक्रवारी रात्री पावसाने जोरदार हजेरी लावली. अनेक ठिकाणी सोयाबीनच्या काढाची पसर शेतातच असल्याने झालेल्या पावसामुळे हे सोयाबीनचे काढ भिजल्याने शेतकऱ्यांचे मोठे नुकसान होण्याची शक्यता आहे.
या पावसामुळे सोयाबीन उत्पादक शेतक-यांचे मोठे नुकसान झाले असले तरी या पावसामुळे जमिनीतील पाणीपातळी वाढण्यास मदत होणार असल्याने व या पावसाचा फायदा रब्बी हंगामासाठी चांगला होणार आहे.