मुंबई - दक्षिण मुंबईतील एका रुग्णालयात वॉर्ड बॉय म्हणून काम करणाऱ्या दोन इसमाना मुंबई पोलिसांच्या गुन्हे शाखेने अटक केली आहे. अटक आरोपींची नावे चैतन्य देसाई आणि राजीव वाल्मिकी अशी आहेत. या प्रकरणात आरोपींनी मुंबईतील ताडदेव परिसरात एका ज्येष्ठ नागरिकाची सीबीआय अधिकारी अशी ओळख सांगत फसवणूक करून त्याची 10 लाख रुपयांनी भरलेली बॅग हिसकावली होती. चोरीची रोकड जप्त करण्यात आली असून पुढील चौकशी पोलीस करत आहेत.

मंगळवारी 11 ऑक्टोबर रोजी एका खासगी कंपनीत काम करणारे 70 वर्षीय ज्येष्ठ नागरिक विजय गांधी हे त्यांच्या व्यवसायाशी संबंधित ग्राहकाला व्यवहारा निमित्त रोख रक्कम देण्यासाठी जात होते. बस स्टॉपवर असताना दोन इसम आपण सीबीआय अधिकारी असल्याचा दावा करत त्यांची चौकशी करू लागले.

बनावट सीबीआय अधिकाऱ्यांनी त्यांची बॅग तपासायची मागणी केली तसेच त्यांना त्यांच्या सोबत येण्यास सांगितले. अखेरीस पिडीत विजय गांधी त्या बोगस अधिकाऱ्यांसोबत गेले. बनावट सीबीआय अधिकाऱ्यांनी वाटेत वृद्ध पिडीताला धक्काबुक्की करत त्याची रोकड असलेली बॅग हिसकावून घेतली. बॅग हाती मिळताच हे दोघेही दुचाकीवरून पळून गेले.

पिडीत विजय गांधी यांनी तत्काळ मुंबईतील ताडदेव पोलिस ठाण्यात घटनेची पूर्ण माहिती दिली दोन्ही दोन्ही आरोपींचे वर्णन दिले. या प्रकरणात गुन्हे शाखा युनिट 3 ने तपास सुरू केला. सीसीटीव्ही फुटेजच्या आधारे पोलिसांनी दोघांची ओळख पटवली. दक्षिण मुंबईतील रुग्णालयात वॉर्ड बॉय म्हणून दोन्ही आरोपी कार्यरत असल्याची पोलिसांना खात्री पटली. कारवाई करत पोलिसांकडून दोन्ही आरोपींना बोलावून त्यांची चौकशी करण्यात आली आणि अखेरीस चौकशी अंती त्यांनी गुन्ह्याची कबुली दिली.