मुंबई: जून महिन्यापासून मुंबईतील दुकाने (shops in mumbai) सुरु ठेवण्यासाठी सम विषम पर्याय अवलंबला जाण्याची शक्‍यता आहे. महानगर पालिका (BMC) तसा विचार करत असून त्याबाबत राज्य सरकारचे मार्गदर्शन घेतले जाणार आहे. मुंबईतील कोविडचा संसर्ग नियंत्रणात आलेला असल्याने आता महानगर पालिकाही शहरातील अर्थकरण टप्प्या टप्पाने पुर्वपदावर आणण्याचा विचार करत आहे. (In month of june shops in mumbai could be open by permission of bmc)

ब्रेक द चेन अंतर्गत आलेल्या लॉकडाऊन मुळे मुंबईत अत्यावश्‍यक सेवेतील दुकाने सकाळी 11 वाजे पर्यंत सुरु ठेवण्याची परवानगी आहे. मात्र,आता 1 जून पासून कोविड नियंत्रणात आलेल्या काही भागात लॉकडाऊन शिथील केला जाण्याची शक्‍यता आहे. असे असले तरी मुंबईतील कार्यालये उद्योगांवरील निर्बंध शिथील करताना महामुंबईतील इतर महानगर पालिका आणि नगरपालिकेतील रुग्णसंख्येचा विचार करावा लागणार आहे.

या ठिकाणी महामुंबईतून येणाऱ्या नोकरदारांची संख्या मोठी असते. त्याबाबतचा निर्णय राज्य सरकार कडून घेतला जाऊ शकतो. मात्र,मुंबईतील दुकानांचे मालक,कामगार हे त्याच परीसरातील असल्याने दुकानांवरील निर्बंध काही प्रमाणात शिथील करण्याची तयारी महानगर पालिकेने केली आहे.याबाबत राज्य सरकारला माहिती देण्यात येणार असून राज्य सरकारने परवानगी दिल्यास शिथीलतेबाबत निर्णय घेण्यात येईल असे पालिकेच्या एका अधिकाऱ्याने सांगितले.

समविषम तारखानुसार दुकाने सुरु ठेवण्याचा विचार महानगर पालिकेचा आहे. सम तारखांना रस्त्याच्या एकाबाजूची दुकाने आणि विषम तारखांना रस्त्याच्या दुसऱ्या बाजूची दुकाने सुरु करण्याची परवानगी दिली जाईल, असेही सांगण्यात आले. मात्र,या फॉर्म्युलासाठी राज्य सरकारची परवानगी मिळणे आवश्‍यक आहे.

उपहारगृह,केशकर्तनालांसाठी काय निर्णय

उपहारगृह कशा प्रकारे सुरु ठेवावेत तसेच केशकर्तनाल सुरु करावेत काय नाही सुरु करायचे असल्यास कोणते नियम पाळावेत. याबाबतची नियमावली राज्य सरकारकडून ठरवली जाण्याची शक्‍यता आहे. राज्य सरकारच्या सुचनांनुसारच उपहारगृह, केशकर्तनालयांना परवानगी देण्याचा विचार महानगर पालिकेचा आहे.