डोंबिवली - हवेची गुणवत्ता पातळी घसरल्याने दिवाळीत वायू प्रदूषणात वाढ होऊ नये यासाठी रात्री 8 ते 10 या वेळेत फटाके फोडण्यात यावेत असे आदेश उच्च न्यायालयाने दिले आहेत. मात्र या आदेशाचे सर्रास उल्लंघन शहरात केले जात असून कल्याण डोंबिवली मध्ये 150 हून अधिक जणांवर गुन्हे दाखल करण्यात आले आहेत. डोंबिवली क्षेत्रात गेल्या दोन दिवसांत 70 ते 80 जणांवर कारवाई करण्यात आली आहे.

वायू प्रदूषणावर नियंत्रण आणून शहरातील हवेची गुणवत्ता सुधारण्यासाठी फटाके वाजविण्याची वेळेवर निर्बंध उच्च न्यायालयाने घालून दिले आहेत. सर्व महापालिका हद्दीत हे नियम जारी करण्यात आले आहेत. मात्र या नियमांची पायमल्ली कोठे ही होताना दिसत नाही. कल्याण डोंबिवली शहरातील अनेक भागात रात्री 10 ते 12 वाजेपर्यंत नागरिक फटाके फोडत होते.

लक्ष्मी पूजन, दिवाळी पाडवा, भाऊबीज या दिवसांत जास्त फटाके शहरात फोडले गेले. पोलिसांनी गेल्या दोन दिवसांत 150 हून अधिक नागरिकांवर नियमांचे उल्लंघन केल्याप्रकरणी गुन्हे दाखल केले गेले आहेत.

यातून नागरिक शहरात प्रदूषण होऊ नये म्हणून कोणती ही काळजी घेताना दिसत नाहीत. फटाक्यांची आतषबाजी करताना ध्वनी व वायू प्रदूषण होणार नाही याची काळजी घेतली पाहिजे. पण ती घेतली जात नाही. लहान मुलं, वृद्ध माणसं, आजारी व्यक्ती, अभ्यास करणारे विद्यार्थी यांना त्रास होऊ नये याची काळजी नागरिकांनी घेतली पाहिजे.

पर्यावरण पूरक दिवाळी साजरी केली पाहिजे. नियमांचे उल्लंघन करणाऱ्या विरोधात कारवाई केली जात असून नागरिकांनी देखील थोडं सहकार्य करावे असे आवाहन सहाय्यक पोलीस आयुक्त सुनील कुराडे यांनी सांगितले.