मोखाडा : मोखाड्यात गेली दोन महिण्यांपासुन वेगवेगळ्या ठिकाणी, बिबट्या चे नागरीकांना दर्शन होत आहे. तसेच करोळ-पाचावर भागात बिबट्या ने मानवी वस्तीत शिरून एका वयोवृद्धाला जखमी केल्याची घटना देखील घडली आहे. आता दोन दिवसांपासून बिबट्या चा वावर सायदे परिसरात असल्याचे अनेकांना आढळून आले आहे. त्यामुळे येथील आदिवासींमध्ये दहशत निर्माण झाली आहे. वनविभागाने बिबट्या चा बंदोबस्त करावा, अशी मागणी येथील नागरीकांनी केली आहे.              

पालघर आणि नाशिक जिल्ह्याच्या हद्दीवर गेली अनेक दिवसांपासून बिबट्या चा मुक्त संचार सुरू आहे. बिबट्या ने श्रीघाट गावाच्या हद्दीत अनेक बकर्या आणि कोंबड्या फस्त केल्या आहेत. त्यानंतर काही दिवसांपूर्वीच करोळ-पाचावर भागात बिबट्या ने मानवी वस्तीत शिरून एका वयोवृद्ध शेतकर्यांला गंभीर जखमी केले आहे. सदरच्या वयोवृद्धाने आरडाओरडा केल्याने तो बचावला होता. ही घटना ताजी असतांना, बिबट्या ने आता सायदे परिसरात आपला मोर्चा वळवला आहे.             

तालुक्यातील सायदे भागात गेली दोन दिवसांपासून, बिबट्या चा रात्री आणि पहाटे च्या सुमारास मुक्त संचार असल्याचे अनेकांना दिसुन आले आहे. मागील घटना बघता येथील आदिवासी दहशतीखाली वावरत आहेत. त्यामुळे वनविभागाने बिबट्या चा तातडीने बंदोबस्त करावा अशी मागणी येथील रहिवासी व पंचायत समिती चे माजी उपसभापती एकनाथ झुगरे यांनी केली आहे.