मुंबई : राज ठाकरे यांना भेटायला गुरू माँ कांचन गिरी गेल्या आहेत. या भेटीवेळी सूर्याचार्य देखील उपस्थित आहेत. त्यांनी म्हटलंय की, हिंदुराष्ट्रासाठी मी मागील अनेक वर्षांपासून काम करते. हिंदुराष्ट्रासाठी प्रत्येकाने एकत्र येणे गरजेचं आहे, म्हणून मी भेट घेतेय असं त्यांनी म्हटलं होतं. या भेटीआधी त्यांनी बाळासाहेब ठाकरे स्मृतिस्थळावर भेट दिली आहे.

या भेटीत राज ठाकरे यांनी त्या दोघांचं स्वागत केलं आहे. कांचन गिरी यांनी राज ठाकरे यांना शिवाजी महाराजांचं चित्र भेट म्हणून दिलं आहे. मुंबई महानगरपालिकेच्या निवडणुकीच्या पार्श्वभूमीवर ही भेट महत्त्वाची मानली जात आहे. या भेटीत राज ठाकरे, शर्मिला ठाकरे देखील उपस्थित आहेत. कालच त्यांनी राज ठाकरे यांचं कौतुक केलं होतं तर उद्धव ठाकरेंवर टीकेची झोड उठवली होती.

जे हिंदुत्व विचारांना एकत्र करुन चालतात, त्या बाळासाहेब ठाकरेंबाबत माझ्या मनात सन्मान आहे. यानंतर मी राज ठाकरेंच्या भेटीला जात आहे. हिंदू राष्ट्रासंदर्भात मी चर्चा करण्यासाठी चालले आहे. भारताला हिंदूराष्ट्र बनवण्यासाठी चर्चा करण्यासाठी मी ही भेट घेत असल्याचं त्यांनी या भेटीआधी स्पष्ट केलं होतं.

कांचन गिरी यांनी मुख्यमंत्री आणि शिवसेना पक्षप्रमुख उद्धव ठाकरे यांच्यावर सडकून टीका केली होती. उद्धव ठाकरे यांनी आपले वडील बाळासाहेब ठाकरेंचं नाव बुडवलं आहे, असं मत कांचन गिरी यांनी व्यक्त केलं होतं. मात्र, यावेळी त्यांनी मनसे प्रमुख राज ठाकरे यांचं कौतुक केलं होतं. मनसेनं आपला झेंडा बदलल्यानंतरच हिंदुत्वाकडे झुकण्याचे संकेत दिले होते. मागे झालेल्या दसऱ्यावेळी देखील मनसेनं गर्व से कहो हम हिंदू है, अशा आशयाचे पोस्टर्स लावले होते.