मुंबई : शहरात कोरोना (Corona) नियंत्रणात आला असला तरी पावसाळी आजार वेगाने पसरत आहेत. मुंबईत (Mumbai) सध्या मलेरियाने (maleria) जोर धरला आहे. मलेरियाचे दोन हजारांहून अधिक रुग्ण आहेत. त्यापाठोपाठ गॅस्ट्रो (Gastro) आणि हेपेटायटिसचे (hepatitis) रुग्णही वाढत आहेत.

मलेरियाचे गेल्या सात महिन्यांपासून मुंबईत २१४६ रुग्ण सापडले आहेत. १८ जुलैपर्यंत मुंबईत ३८५ मलेरियाचे रुग्ण सापडले आहेत. गेल्या वर्षीच्या जुलै महिन्यात एकूण ९५४ रुग्ण सापडले होते; मात्र आतापर्यंत मलेरियाचे सर्वाधिक रुग्ण सापडले आहेत. मलेरियाचे सर्वाधिक रुग्ण हे जी दक्षिण, ई, एफ दक्षिण आणि जी उत्तर या वॉर्डमध्ये सध्या सापडत आहेत. गॅस्ट्रो आणि हेपेटायटीस रुग्णही वाढत असून, गॅस्ट्रोच्या १४३२ रुग्णांची नोंद झाली आहे. हेपेटायटीसचे १०८ रुग्ण सापडले आहेत, अशी माहिती पालिकेच्या आरोग्य विभागाने दिली.

• लेप्टोस्पायरोसिसचे रुग्ण दुप्पट

लेप्टोस्पायरोसिसचे रुग्ण गेल्या वर्षीच्या जुलैच्या तुलनेत या वर्षी दुप्पट नोंदले गेले आहेत. गेल्या वर्षी जुलैमध्ये १४ रुग्णांची नोंद झाली होती; पण यंदा २६ रुग्ण आतापर्यंत सापडले आहेत. सात महिन्यांत आतापर्यंत ८५ रुग्णांची नोंद पालिकेने केली आहे.

• स्वाईन फ्लूचे रुग्ण जास्त

या वर्षीच्या जुलैमध्ये आतापर्यंत स्वाईन फ्लूचे १५ रुग्ण सापडले आहेत. गेल्या वर्षी स्वाईन फ्लूचा एकही रुग्ण सापडला नव्हता. या वर्षी जुलैपर्यंत एकूण २२ रुग्णांची नोंद झाली. स्वाईन फ्लूचे सर्वाधिक रुग्ण मुंबईतील डी, जी दक्षिण, के पूर्व, के पश्चिम, पी. एस आणि टी वॉर्डमध्ये सापडले आहेत. म्हणजेच आतापर्यंत या वॉर्डमधून सर्वाधिक रुग्णांची नोंद झाली.

पावसाळ्यात सर्वाधिक काळजी घेणे गरजेचे आहे. मान्सून संबंधित रुग्ण पूर्वीपेक्षा १० ते २० टक्के वाढले आहेत. मान्सून संबंधित आजारांमध्ये डेंगी, व्हिवॅक्स मलेरिया, फाल्सीपेरम मलेरिया हे आजार आहेत. अनेक रुग्णांना स्वाईन फ्लूचा संसर्गही झाला आहे. कोविड आणि नॉन-कोविड आजारांची लक्षणे सारखीच असल्याने उपचार करताना गफलत होऊ शकते. त्यामुळे डॉक्टरांचा सल्ला घ्या.

- डॉ. हरीश चाफले, वरिष्ठ सल्लागार, पल्मोनोलॉजी आणि क्रिटिकल केअर, ग्लोबल रुग्णालय

पावसाळी आजारांसाठी मुंबई पालिका सज्ज आहे. सर्व रुग्णालयांना खाटा आरक्षित ठेवण्यास सांगितले आहे.

- सुरेश काकाणी, अतिरिक्त आयुक्त, पालिका