मुंबई : गेले वर्षभर आजारी असलेले अभिनेते-दिग्दर्शक नीरज व्होरा यांचे आज (गुरुवार) पहाटे निधन झाले. ह्रदयविकाराचा झटका आणि ब्रेन स्ट्रोकमुळे गेले 13 महिने नीरज व्होरा कोमामध्ये होते. अंधेरीतील क्रिती केअर हॉस्पिटलमध्ये त्यांचे पहाटे चारच्या सुमारास निधन झाले. 

ज्येष्ठ अभिनेते परेश रावळ यांनी ट्विटरवरून या बातमीस पुष्टी दिली. गेले काही महिने नीरज व्होरा निर्माते फिरोज नाडियादवाला यांच्या घरी होते. काल रात्री त्यांची तब्येत बिघडल्याने त्यांना रुग्णालयात दाखल करण्यात आले होते. 

'सर्कस' या टीव्ही मालिकेपासून व्होरा यांनी लेखक म्हणून कारकिर्दीस सुरवात केली. 1995 मधील रामगोपाल वर्मा यांच्या 'रंगीला' चित्रपटाद्वारे व्होरा यांनी लेखक म्हणून चित्रपटसृष्टीत पदार्पण केले. 'राजू बन गया जंटलमन', 'अकेले हम अकेले तुम', 'विरासत', 'मन', 'सत्या', 'दौड', 'पुकार' सारख्या चित्रपटांमध्ये त्यांनी अभिनयही केला होता. 2015 मध्ये झळकलेला 'वेलकम बॅक' अभिनेता म्हणून त्यांचा अखेरचा चित्रपट ठरला. 

'हेरा फेरी' या गाजलेल्या चित्रपटाचे लेखन त्यांनी केले होते. त्यानंतर 'फिर हेरा फेरी' या चित्रपटाचे दिग्दर्शनही त्यांनी केले होते. 'हेरा फेरी 3' चित्रपटाची घोषणा व्होरा यांनी गेल्या वर्षी केली होती.