मुंबई : म्हाडामार्फत (Mhada) जागतिक बँक प्रकल्पांतर्गत (world bank project) तीस वर्षांपूर्वी विविध संस्थांना वाटप केलेले निवासी भूखंड (residential land) विनावापर पडून आहेत. या भूखंडांचे वाटप रद्द करण्यासाठी म्हाडाच्या मुंबई मंडळाने (Mumbai region) 25 प्रस्ताव गृहनिर्माण विभागाकडे पाठवले होते. त्यापैकी क्रिकेटपट्टू सुनील गावस्कर (sunil Gavaskar) यांचा भूखंड कायम ठेवण्याचा निर्णय गृहनिर्माण विभागाने घेतला आहे. तर सुमारे पाच भूखंड ताब्यात घेण्याचे आदेश गृहनिर्माण विभागाने मुंबई मंडळाला दिले आहेत.

जागतिक बँकेच्या योजनेतून म्हाडाने 30 वर्षांपूर्वी काही संस्थांना चारकोप, गोराई या परिसरात भूखंड दिले. काही संस्थांनी भूखंडावर बांधकाम केले आहे. तर अनेक संस्थांनी भूखंड ताब्यात ठेवले आहेत. भूखंड विकसित न झाल्याने त्यावर अतिक्रमण झाले आहे तर काही भूखंड कचराकुंड्या बनल्या आहेत. याचा स्थानिक नागरिकांना त्रास होऊ लागल्याने म्हाडाकडे नागरिकांकडून तक्रारी आल्या आहेत. त्यानुसार म्हाडाने असे अविकसित भूखंड ताब्यात घेण्याचे ठरवले आहे.

भूखंड घेऊन ते विकसित न करणाऱ्या संस्थांमध्ये अनेक नामांकित संस्था आहेत. राज्य सरकारने या संस्थांना भूखंड वाटप करण्याचा निर्णय घेतल्याने भूखंडाचे वाटप रद्द करण्यासाठी मुंबई मंडळाने २५ प्रस्ताव गृहनिर्माण विभागाकडे पाठवले होते. त्यापैकी सुमारे पाच भूखंडाचे वाटप रद्द करण्याचा निर्णय गृहनिर्माण विभागाने घेतला आहे.

तर क्रिकेटपट्टू सुनील गावस्कर यांचा भूखंड कायम ठेवण्याचा निर्णय घेतला आहे. यामुळे एकाला एक न्याय आणि दुसऱ्याला वेगळा असा भेदभाव झाला असल्याची चर्चा म्हाडा वर्तुळात सुरु आहे. म्हाडामार्फत वाटप झालेले भूखंड विनावापर पडून होते. भूखंड वाटप रद्द करण्याचे काही प्रस्ताव गृहनिर्माण विभागाकडे पाठवले होते. त्यापैकी चार पाच भूखंडांचे वाटप रद्द करण्यात आले आहे, असे मुंबई मंडळाचे मुख्य अधिकारी योगेश म्हसे यांनी सांगितले.