मुंबई- महायुतीची राज्यातील सांगता सभा आज शिवाजी पार्क येथे होत आहे. यावेळी पंतप्रधान मोदी आणि मनसे प्रमुख राज ठाकरे पहिल्यांदाच एका व्यासपीठावर आले होते. राज ठाकरे यांनी यावेळी बोलताना आपल्या भाषणाची सुरुवात माजी पंतप्रधान पंडित जवाहरलाल नेहरु यांच्या नावाने केली.

पंडित जवाहरलाल नेहरु हे देशाचे तीनवेळा पंतप्रधान झाले होते. यांच्यानंतर आता देशाचे तिसऱ्यांदा पंतप्रधान होणारे नरेंद्र मोदी यांचे मी स्वागत करतो, असं म्हणत राज ठाकरेंनी भाषणाची सुरुवात केली. राज ठाकरे यांनी गेल्या दहा वर्षांमध्ये नरेंद्र मोदी यांनी घेतलेल्या निर्णयांचे कौतुक केले.

बाबरी मशिद पाडल्यात आली. कारसेवकांना ठार मारण्यात आलं. शरयू नदीमध्ये कारसेवकांचे मृतदेह फेकण्यात आले. ते चित्र माझ्या डोळ्यासमोरुन गेलं नाही. मला वाटलं नव्हतं. राम मंदिर बनेल, पण मी मोदींना धन्यवाद देतो की ते होते म्हणून राम मंदिर बनलं. अन्यथा ते बनलं नसतं. स्वातंत्र्यापासून जम्मू-काश्मीरचा मुद्दा तसाच होता. पण, मोदींनी कलम ३७० हटवलं. आज खऱ्या अर्थाने जम्मू-काश्मीर भारताचा भाग झाला आहे, असं राज ठाकरे म्हणाले.