नवी मुंबई - अपंगत्व, शारीरिक व्यंग यांसारख्या आजारांपासून मुलांचे संरक्षण करण्यासाठीच्या गोवर-रुबेला लसीकरण मोहिमेला नवी मुंबईत मोठा प्रतिसाद मिळाला आहे. शहरात अवघ्या तीन महिन्यांत सुमारे साडे पाच लाख मुलांना ही लस टोचण्यात आली आहे. 

जागतिक आरोग्य संघटनेच्या मान्यतेने केंद्र आणि राज्य सरकारमार्फत संपूर्ण नवी मुंबईत 27 नोव्हेंबरला गोवर-रुबेला लसीकरणाला सुरुवात करण्यात आली. लसीकरणाबाबत पालकांमधील असणारी शंका दूर करण्यासाठी पालिकेने जनजागृती केली होती. त्याचा चांगला परिणाम दिसला. 

महापालिकेचे अतिरिक्त आयुक्त महावीर पेंढारी यांच्या अध्यक्षतेखाली पालिका मुख्यालयात गोवर-रुबेला लसीकरण सिटी टास्क समितीची आढावा बैठक घेण्यात आली. या बैठकीत आरोग्य विभागाने शहरात 91 टक्‍क्‍यांपर्यंत लसीकरण मोहीम यशस्वी करण्यात आल्याची माहिती दिली. पुढील मोहिमेत हा आकडा 95 टक्‍क्‍यांच्याही वर नेण्यात येईल, अशी माहिती वैद्यकीय आरोग्य अधिकारी डॉ. दयानंद कटके यांनी दिली. 

4 जानेवारीपर्यंतची आकडेवारी 
- शाळांचा सहभाग : 430 
- शाळेत लसीकरण : 2 लाख 48 हजार 394 
- शाळांव्यतिरिक्त लसीकरण : 3 लाख 16 हजार 785 

एका बाटलीत चार-पाच मुलांसाठी लस 
गोवर-रुबेला इंजेक्‍शनच्या एका बाटलीतून एका वेळेस चार ते पाच मुलांना लस टोचता येते. तेवढी मुले नसतील तर ती लस तासाभरात उडून जाते. त्यामुळे काही वेळा एकाच मुलाला पालक आरोग्य केंद्रात घेऊन आल्यास केंद्रांतर्फे पालकांचा संपर्क क्रमांक घेऊन त्याला नंतर लस देण्यासाठी बोलावण्यात येते.