मुंबई - दुधात भेसळ करणाऱ्यांच्या विरोधात कठोर कारवाई करण्याचे आदेश अन्न व औषध प्रशासन मंत्री गिरीश बापट यांनी बुधवारी संबंधित अधिकाऱ्यांना दिले. 

मुंबईत रोज लाखो लिटर दुधाची विक्री होते. सणासुदीवेळी ग्राहकांना भेसळ केलेले दूध विकले जाऊ नये, यासाठी अन्न व औषध प्रशासनाने मुंबईत येणाऱ्या दुधाची तपासणी करण्याची मोहीम हाती घेतली आहे. मंगळवारी झालेल्या कारवाईत सुमारे साडेतीन लाख लिटर दूध सील करण्यात आले. 

किमान २० हजार लिटर भेसळयुक्त दूध नष्ट करण्यात आले आहे. मुंबईचे प्रवेशद्वार असणाऱ्या मुलुंड नाका, दहिसर नाका, मानखुर्द नाका, ऐरोली टोल नाका, मुलुंड पूर्व नाका या पाच ठिकाणी दुधाची तपासणी करण्यात आली. अन्न व औषध प्रशासन मंत्री गिरीश बापट यांच्या मार्गदर्शनात झालेली ही मोहीम पाचही ठिकाणी एकाच वेळी पहाटेपर्यंत सुरू होती. या तपासणीत २२७ वाहनांतील नऊ लाख २२ हजार ९२८ लिटर दूध तपासण्यात आले. या प्राथमिक तपासणीत दुधाचे पाच ब्रॅण्डचे नमुने निकृष्ट दर्जाचे आढळून आले. त्यामुळे तीन लाख ४४ हजार लिटर दूध सील करण्यात आले. तसेच, दुधाच्या आठ टॅंकरमध्ये भेसळयुक्त दूध आढळले. या भेसळीत अमोनिआ सल्फेट, शुगर, माल्टोडेक्‍स्ट्रीन हे घातक पदार्थ आढळले. त्यामुळे हे १९ हजार २५० लिटर दूध नष्ट करण्यात आले. हे दूध ज्या जिल्ह्यांतून आले होते, त्या जिल्ह्यांतील संबंधित अधिकाऱ्यांवर कारवाईचे आदेश देण्यात आले आहेत.