Mumbai News: कोस्टल रोड हा पूर्णपणे टोलमुक्त असला पाहिजे, अशी मागणी मुंबई काँग्रेसच्या अध्यक्षा वर्षा गायकवाड यांनी केली आहे. या आश्वासनपूर्तीसाठी आम्ही सरकारला धारेवर धरू असेही त्यांनी सांगितले

मुंबईच्या विकासात मोलाचा ठरणारा कोस्टल रोड हा काँग्रेसच्या संकल्पनेतुन आणि पुढाकारातून उदयास आलेला आहे. तत्कालीन मुख्यमंत्री विलासराव देशमुख यांच्या काळात ही योजना आखली व पृथ्वीराज चव्हाण यांनी अंमलबजावणीसाठी मोठे पाऊल उचलले.महाविकास आघाडी सरकारच्या काळातही या प्रकल्पाला गती देण्याचे काम झाले आहे. याची आठवणही वर्षा गायकवाड यांनी करून दिली.

बस लेनची गरज

कोस्टल रिंगरोड पूर्णपणे कार्यान्वित झाल्यावर मुंबईतील उत्तर-दक्षिण कनेक्टिव्हिटीच्या दृष्टीकोनातून अतिशय फायदेशीर ठरेल. कोणत्याही सार्वजनिक पायाभूत सुविधा प्रकल्पाचा सर्वात जास्त फायदा सर्वसामान्य नागरिकांना झाला पाहिजे. कोस्टल रोडसाठी एक समर्पित बस लेन असणे आवश्यक आहे. प्रकल्पासाठी पर्यावरण परवानग्या मागताना तसा शब्द पर्यावरण मंत्रालयाला दिला आहे असेही गायकवाड यांनी सांगितले.