प्रियकर विवाहित असल्याचे समजल्यानंतर त्याच्याशी संबंध तोडणाऱ्या तरुणीचे अश्‍लील फोटो आणि व्‍हिडीओ तिचा होणारा पती आणि नातेवाइकांना पाठवून बदनामी केल्याचा प्रकार पनवेलमध्ये उघडकीस आला आहे.

दत्तात्रय दिनकर सूर्यवंशी (वय २७) असे आरोपीचे नाव असून पनवेल पोलिस ठाण्यात त्याच्याविरोधात बलात्कारासह विनयभंग तसेच माहिती तंत्रज्ञान कायद्यानुसार गुन्हा दाखल झाला असून भिवंडीतील नारपोली पोलिस ठाण्यात वर्ग करण्यात आल आहे.

२२ वर्षीय पीडित तरुणी ही पनवेल भागात राहत असून सूर्यवंशी हा ऐरोलीत राहतो. वर्षाभरापूर्वी कामाच्या ठिकाणी दोघांची भेट झाली होती. तेथे त्यांच्यात प्रेमसंबंध निर्माण झाले. सूर्यवंशी याने या तरुणीवर भिवंडीतील मानकोली गावातील त्याच्या घरात लैंगिक अत्याचार केले. त्यानंतर इतर ठिकाणीही तिचे वारंवार लैंगिक शोषण केले. काही महिन्यांपूर्वी सूर्यवंशी हा विवाहित असल्याचे समजल्यानंतर तिने त्याच्यासोबतचे संबंध तोडले होते.

मात्र, तो पूर्वीप्रमाणे प्रेमसंबंध सुरू ठेवण्यासाठी तिच्यावर दबाव टाकत होता. त्यास तिने ठाम नकार दिला. त्यानंतर तिचे दुसऱ्या मुलासोबत लग्न ठरले. याबाबत माहिती मिळताच सूर्यवंशी याने तिच्या भावी पतीला आणि तिच्या भावाला अश्‍लील फोटो आणि व्‍हिडीओ पाठवून तिची बदनामी केली. याबाबत पीडित तरुणी आणि तिच्या भावाने त्याला जाब विचारला असता त्याने त्यांना धमकावले.

यानंतर पीडित तरुणीने पनवेल शहर पोलिस ठाणे गाठून तक्रार दाखल केली. त्यावरून पनवेल पोलिसांत गुन्हा दाखल करून नारपोली पोलिस ठाण्यात झीरो नंबरने वर्ग करण्यात आला असल्याची माहिती सहायक पोलिस निरीक्षक स्वप्नील केदार यांनी दिली.