नितीन बिनेकर

मुंबई - मुंबईकरांना स्वतः आणि प्रदूषण मुक्त जलमार्गे प्रवास करता यावा यासाठी जलयान धारकांनी इलेक्ट्रिक वॉटर टॅक्सी सुरु करण्याचा निर्णय घेतला आहे. परदेशातील तीन कंपन्या इलेक्ट्रिक वॉटर टॅक्सी ऑर्डर सुद्धा देण्यात आलेल्या आहे.

त्यामुळे दिवाळीनंतर प्रत्येक्षात इलेक्ट्रिक वॉटर टॅक्सी मुंबईकरांचा सेवेत दाखन होणार आहे. त्यामुळे वॉटर टॅक्सीचे तिकीट दर सुद्धा कमी होणार असल्याची माहिती जलयान धारकांनी सकाळला दिली आहेत.

मुंबईनजीकच्या शहरांतून सकाळी व गर्दीच्यावेळी येताना वाहन चालकांना प्रचंड वाहतूक कोंडीचा सामना करावा लागतो. रस्ते वाहतुकीवरील ही कोंडी फोडण्यासाठी जलमार्ग वाहतुकीला चालना देण्यासाठी मुंबईच्या नजीकच्या शहरांना जलमार्गाने जोडणाऱ्या वॉटर टॅक्सी आणि रोपॅक्स फेरी सुरु झाली आहे.

आता तर, खाडी मार्ग जोडण्याचा निर्णय सागरी महामंडळाने घेतला आहे. त्यामुळे भविष्यात मोठ्या प्रमाणात जलद मार्गाचा वापर प्रवासी वाहतुकीसाठी करण्यात येणार आहे. परंतु सध्या सुरु असलेल्या वॉटर टॅक्सी पेट्रोल आणि डिझेल सारख्या इंधनावर धावत असल्याने या सेवेचे तिकीट भाडे जास्त आहे.

त्यामुळे सर्वसामान्य मुंबईकरांना वॉटर टॅक्सीचा प्रवास परवडत नाही. त्यामुळे वॉटर टॅक्सीचे तिकीट दर कमी करण्यासाठी अत्याधुनिक इलेक्ट्रीक इंजिन असलेल्या बोटीचा वापराबाबत काही जलयान धारकांनी सागरी महामंडळाकडे तयारी दाखविली आहे. या बोटी खरेदीसाठी प्रकल्प फायनान्सर व बॅटरी उत्पादकासोबत चर्चा सुद्धा जलयान धारकांची झाली असल्याची माहिती सागरी महामंडळाच्या वरिष्ठ अधिकाऱ्यांनी दिली आहे.

कोव्हीडमुळे उशीर-

इन्फिनिटी हार्बर सर्व्हीसेसचे व्यवस्थापकीय भागीदार सोहेल कझानी यांनी सकाळला सांगितले की, सध्या सुरु असेल्या हायस्पीड वॉटर टॅक्सी चालविण्यासाठी मोठया प्रमाणात इंधनावर खर्च लागतोय.

त्यामुळे इंधनावरील खर्च कमी करण्यासाठी आणि प्रवाशांना स्वतः तिकीट दरात वॉटर टॅक्सी सेवा पुरविण्यासाठी इलेक्ट्रिक वॉटर टॅक्सी सुरू करण्याचा निर्णय घेतले होता. परदेशातील तीन कंपन्या वॉटर टॅक्सी ऑर्डर सुद्धा देण्यात आलेल्या आहे. परंतु कोव्हीडमुळे ३० आठवड्यानंतर ऑर्डर प्लेस होणार आहे. त्यामुळे इलेक्ट्रिक वॉटर टॅक्सी यायला थोडा उशीर झाला आहे.

सहा महिन्यात काम पूर्ण -

सध्या दुबईतून एक वॉटर टॅक्सी आणली आहे. या वॉटर टॅक्सीला इलेक्ट्रिक टॅक्सीमध्ये कन्व्हर्ट करण्यात येत आहे. येत्या काही महिन्यात हे काम पूर्ण होणार आहे. याशिवाय या इलेक्ट्रिक टॅक्सीचा चार्जिगसाठी जेट्टीवर चार्जिंग स्टेशन उभारण्यात येणार आहे.

यासाठी जवळ जवळ सहा महिन्याचा कालावधी लागणार आहे. यंदाचा दिवाळीत प्रत्येक्षात पहिली इलेक्ट्रिक टॅक्सी सेवा सुरु होणार आहे. त्यानंतर वॉटर टॅक्सीचे तिकीट दर कमी करता येईल. तसेच प्रदूषण सुद्धा होणार नाही. पर्यावरणस्नेही वॉटर टॅक्सीतुन प्रवास करणाऱ्या प्रवाशांची संख्या सुद्धा वाढणार असल्याची माहिती इन्फिनिटी हार्बर सर्व्हिसेसकडून देण्यात आली आहे.