मुंबई : तृतीयपंथी समाजाला दैनंदिन आयुष्यात अनेक समस्यांना तोंड द्यावं लागतं. तर अनेकदा सामान्य लोकांकडून त्यांना हीन लेखलं जातं. त्यांना इतरांप्रमाणे चांगली वागणूक समाजाने द्यावी यासाठी अनेकजण प्रयत्न करत असतात. त्यांना रोजगार आणि व्यवसायासाठी अनेकदा विरोधही केला जातो पण मुंबईत तृतीयपंथीयांकडून चालवले जाणारे पहिले सलून सुरू करण्यात आले आहे.

या सलूनमध्ये तब्बल सात लोकं काम करत असून झैनाब असं या सलूनच्या मालकाचे नाव आहे. झैनाब या तृतीयपंथी असून या समाजासाठी काहीतरी चांगलं काम करावं या हेतून त्यांनी हे सलून सुरू केले असल्याचं त्यांनी सांगितलं आहे. या सलूनमध्ये ट्रान्सजेंडर लोकांना प्रशिक्षण तसेच रोजगार देण्यात येणार आहे. त्याचबरोबर डॉइश बँक आणि रोटरी क्लब ऑफ बॉम्बे यांच्या सहकार्याने हे सलून सुरू करण्यात आले.

ज्या समाजात ट्रान्सजेंडर समुदाय खूप वेगळा आणि दुर्लक्षित समजला जातो, त्या समाजासाठी हे छोटेसे पाऊल असल्याचं त्यांनी सांगितलं. हेच छोटे पाऊल समाजासाठी मोठी झेप ठरणार असल्याचं सूतोवाचही झैनाब यांनी केलं आहे.