डोंबिवली : आषाढी एकादशी आणि ईद सणाच्या पार्श्वभूमीवर शहरात कोणताही अनुचित प्रकार घडू नये म्हणून कल्याण परिमंडळ 3 मधील सर्व पोलीस ठाण्यातील पोलीस सतर्क होते. दुर्गाडी किल्ला येथे मुस्लिम बांधव नमाज पढत असतानाच किल्ल्याच्या पायथ्याशी हिंदु समाज घंटानाद आंदोलन करत होता.

सेनेच्या या आंदोलनामुळे शहरात काही काळ तणावाचे वातावरण असतानाच कोळसेवाडी पोलिसांना गुंड मन्या यादव हा साकेत परिसरात पिस्तूल जवळ बाळगून फिरत असल्याची माहिती मिळाली. पोलिसांनी तात्काळ साकेत परिसरात जाऊन मन्या याला बेड्या ठोकत अटक केली.

राज्यात गुरूवारी आषाढी एकादशी व बकरी ईद सण सर्वत्र उत्साहात साजरा केला जात होता. या दोन्ही सणांदरम्यान कोणताही अनुचित प्रकार घडून कायदा, शांतता आणि सुव्यवस्थेचा प्रश्न निर्माण होऊ नये यासाठी कोळसेवाडी पोलिसांनी कडेकोट बंदोबस्त तैनात केला होता.

सहाय्यक पोलिस निरीक्षक हरिदास बोचरे हे त्यांच्या पथकासह गस्त घालत असतानाच सराईत गुन्हेगार मनोज उर्फ मन्या बसवराज यादव हा साकेत कॉलेज परिसरात अग्निशास्त्र बाळगून फिरत असल्याची माहिती गुप्त बातमीदाराकडून मिळाली होती. सहाय्यक पोलीस निरीक्षक बोचरे यांनी तात्काळ पथकासह साकेत कॉलेज परिसरात जाऊन मन्या यादव याला ताब्यात घेतले.

अंग झडती दरम्यान या गुंडाकडे एक अग्निशस्त्र आढळून आले. अधिक चौकशी केली असता या गुंडांच्या नावावर खून, खुनाचा प्रयत्न, सशस्त्र हाणामाऱ्यांचे 5 गुन्हे दाखल असल्याचे उघडकीस आले. पोलिसांनी मन्या याच्याकडून पिस्तुल हस्तगत केले असून या प्रकरणी पोलिस अधिक तपास करत आहे.