Mumbai Center Railway Local Service Disturb : मुंबईत लोकलने प्रवास करणाऱ्या प्रवाशांना आठवड्याच्या पहिल्याच दिवशी मध्य रेल्वेच्या जलद मार्गावरील लोकल सेवा विस्कळीत झाल्याने नाहक त्रासाला सामोरे जावे लागले. दरम्यान, करी रोड स्थानकावर झालेला तांत्रिक बिघाड दुरूस्त करण्यात रेल्वे प्रशासनाला यश आले असून, विस्कळीत झालेली रेल्वे सेवा पुन्हा सुरळीत झाली आहे. तांत्रिक बिघाडामुळे या मार्गावरील रेल्वेची जलद सेवा विस्कळीत झाली होती. करीरोड स्थानकाजवळ तांत्रिक बिघाड झाल्यामुळे ही वाहतूक विस्कळीत झाली होती. या तांत्रिक बिघाडामुळे करीरोड स्थानकाजवळ एक एक्स्प्रेसदेखील रखडली होती.

आज आठवड्याचा पहिलाच दिवस असून, यामुळे कामावर जाण्यासाठी सर्वच रेल्वे स्थानकांवर प्रवाशांची मोठी गर्दी असते. त्यात अनेकजण कामावर जाण्यासाठी जलद रेल्वेने प्रवास करण्यास प्राधान्य देतात. मात्र, आज आठवड्याच्या पहिल्याच दिवशी करी रोड स्थानकावर तांत्रिक बिघाडामुळे मध्य रेल्वेची जलद वाहतूक रखडली होती. यामुळे कामावर जाणाऱ्या चाकरमान्यांचे मोठ्या प्रमाणावर अडचण निर्माण झाली होती. मात्र, उद्भवलेला तांत्रिक बिघाड रेल्वे कर्मचाऱ्यांकडून त्वरीत दुरूस्त करण्यात आल्यामुळे आता या मार्गावरील रेल्वेची सेवा पुन्हा पुर्ववत करण्यात यश आले आहे. तांत्रिक बिघाडामुळे साधारण अर्ध्या तासा जलद मार्गावरील वाहतूक विस्कळीत झाली होती.