मुंबई - मुंबई शहरात पहिल्यांदाच नवरात्रोस्तव व छटपूजा या दोन्ही उत्सवांचे संपूर्ण नियोजन महापालिका प्रशासन आणि पोलीस प्रशासनाने करणार आहे. गणेशोस्तवाच्या धर्तीवर ही व्यवस्था केली जाणार आहे. विशेष म्हणजे यावेळी छटपुजेसाठी कृत्रिम तलावापासून सर्व व्यवस्था पालिका उभारणार आहे. मुंबई शहराच्या इतिहासात पहिल्यांदा हा निर्णय घेतल्याचा दावा मुंबई भाजपाकडून करण्यात आला आहे.

या संदर्भात मुंबई उपनगराचे पालकमंत्री मंगलप्रभात लोढा आणि मुंबई भाजपा अध्यक्ष आमदार आशिष शेलार यांच्या उपस्थितीत नवरात्रोत्सव मंडळ आणि छटपूजा आयोजक मंडळ यांची संयुक्त बैठक पालिका मुख्यालयात पार पाडली. या बैठकीत हा निर्णय घेतल्याचे आमदार आशिष शेलार यांच्याकडून सांगण्यात आले.

मुंबई शहरात १२०० हून अधिक नवरात्री मंडळे दरवर्षी अधिकृतरित्या उस्तवासाठी परवानगी घेतात. तसेच मुंबई शहरात ८२ हून अधिक ठिकाणी छटपूजेचे आयोजन केले जाते. या निर्णयाबद्दल सर्व नवरात्रोत्सव मंडळ आणि छटपूजा आयोजक मंडळ यांनी आशिष शेलार मंगलप्रभात लोढा यांचे आभार मानले आहे.

पालिका काय करणार आहे

१. नवरात्रोत्सावासाठी लागणाऱ्या सर्व परवानग्या एक खिडकी योजनेमार्फत देणार

२. बिगर व्यावसायिक नवरात्री मंडळासाठी परवानगी शुल्क, अग्निशमन शुल्क माफ केले जाईल.केवळ १०० रुपये अमानत रक्कम आकारणार

३. दुर्गा मूर्ती विसर्जनासाठी कृत्रिम तलावांची व्यवस्था, दिवे, शौचालय,निर्माल्य कलश इ. व्यवस्था

५. छटपूजेसाठी आवश्यक कृत्रिम तलाव, शौचालय, निर्माल्य कलश

६. छटपूजेसाठी महिलांना कपडे बदलण्यासाठी स्वतंत्र कक्षाची सुविधा

७. छटपूजेसाठी सूर्यास्ताच्या वेळी सूर्योदयाच्यावेळी आवश्यक पोलीस बंदोबस्त

८. नवरात्री, रास दांडिया, गरबा आयोजनात महिला सुरक्षेसाठी महापालिका व पोलीस प्रशासन यांच्याकडून जनजागृती बॅनर्स लावण्यात येतील.