मुंबई-पुणे (Mumbai-Pune) द्रुतगती मार्गावर अपघात टाळण्यासाठी महामार्ग पोलिस(Highway Police) आणि राज्य परिवहन विभागाकडून खबरदारी घेतली जात असूनही अपघात (Accident) आणि मृत्यूंच्या (Death) संख्येत घट होत नसल्याचे दिसून येत आहे. लॉकडाऊन (Lockdown) असतानाही गेल्या वर्षभरात मार्गावर १६० अपघात आणि ६६ जणांचा अपघाती मृत्यू झाला होता; तर या वर्षी जानेवारी (January) ते जून (June) या सहा महिन्यांतच ४१ अपघात आणि ५० मृत्यू झाले आहे. गेल्या वर्षी याच कालावधीत २५ अपघातात २८ मृत्यू झाले होते.

अवजड वाहनांची लेन कटिंग, ओव्हर स्पिडिंग, मद्यसेवन करून वाहन चालवणे, हायवेवरील सूचनांचे पालन न करणे, नो पार्किंग आणि नादुरुस्त वाहने चालवणे, हे अपघातांचे प्रमुख कारण आहे. २०१९ च्या तुलनेत २०२० मध्ये अपघातांची संख्या कमी झाली होती; मात्र आता अपघात आणि मृत्यूंची संख्या दुपटीने वाढली आहे.

सध्या कोरोनाचे निर्बंध बऱ्यापैकी शिथिल करण्यात आले असून सार्वजनिक आणि खासगी वाहतुकीवर कोणतेही निर्बंध नसल्याने अपघात आणि अपघाती मृत्यूच्या संख्येत वाढ होण्याची शक्यता वर्तविण्यात आली आहे. महामार्ग पोलिस, महाराष्ट्र राज्य रस्ते विकास महामंडळ आणि परिवहन विभागामार्फत मुंबई-पुणे महामार्गावर अपघात टाळण्यासाठी विविध उपाययोजना केल्या जात असूनही हा महामार्ग चालकांच्या निष्काळजीपणामुळे मृत्यूचा सापळा ठरत असल्याचे दिसून येत आहे