डोंबिवली - कल्याण परिसरात रस्त्यावर उभ्या असलेल्या जेसीबीला एका टेम्पोने जोरदार धडक दिल्याची घटना सकाळी घडली. झाडाची तुटलेली फांदी बाजूला करण्याचे काम जेसीबी व काही कर्मचारी करत होते याचदरम्यान हा अपघात झाला आहे. या अपघातात काही नागरिक थोडक्यात वाचले असून टेम्पोचालक किरकोळ जखमी झाल्याची प्राथमिक माहिती मिळाली आहे.

कल्याण पश्चिमेच्या वासुदेव बळवंत फडके मैदानासमोरील सुभाष नगर येथे आज सकाळी झाडाची भलीमोठी फांदी तुटून रस्त्यावर पडली. सुदैवाने यामध्ये कोणालाही दुखापत झाली नसली तरी रस्ता मात्र बंद झाला.

तर रस्त्यावर पडलेली ही भलीमोठी फांदी जेसीबीच्या सहाय्याने बाजूला करून रस्ता मोकळा करण्याचे काम सुरू होते. परिणामी सुभाष नगरकडून लालचौकीकडे येणारा मार्ग बंद ठेवण्यात आला होता.

दरम्यान ही फांदी जेसीबी आणि कर्मचाऱ्यांच्या साहाय्याने बाजूला केली जात असताना एक टेम्पो त्याच मार्गावरून लालचौकीकडे भरधाव वेगाने येत होता.

आणि जेसीबीचालक आणि त्या शेजारी काम करणाऱ्या कर्मचाऱ्यांना काही समजायच्या आतच या टेम्पोने जेसीबीला धडक दिली. ही धडक इतकी जोरदार होती की हा जेसीबी तब्बल दीड ते दोन फूट पुढे ढकलला गेला.

जेसीबीचा मागचा पंजा टेम्पोची पुढची काच तोडून थेट टेम्पोच्या केबिनमध्ये घुसला. ज्यामध्ये हा टेम्पो चालक त्यात अडकून पडला. या टेम्पोमध्ये आणखी कोणी होते की नाही याबाबत माहिती मिळू शकली नाही.

तर टेम्पोमध्ये अडकलेल्या चालकाला बाहेर काढण्यासाठी स्थानिक नागरिकांना मोठे प्रयत्न करावे लागले. टेम्पोचालक मद्यपान करून गाडी चालवत असल्याचा आरोप यावेळी काही नागरिकांकडून करण्यात आला.