मुंबई : विदेशी मद्यावरील उत्पादन शुल्क 50 टक्के कपात करण्याचा निर्णय राज्य सरकारने घेतला असल्याने नववर्षापूर्वीच व्हिस्की स्कॉचचे दर घसरणार आहेत. 300 वरून तब्बल 150 टक्के उत्पादन शुल्क कपात झाल्याने दर सुद्धा घटणार आहे. मात्र, अद्याप उत्पादन कंपन्यांनी राज्य उत्पादन शुल्क विभागाला आपले दर सादर केले नसल्याने मद्य विक्रीचे दर जाहीर होणे बाकी आहे. त्यामुळे विक्रेत्यांमध्ये अद्याप संभ्रम आहे.

ब्लॅक डॉग, टीचर्स, जॉनी वॉकर, ब्लॅक लेबल, शीवास रिगल अशा लोकप्रिय विदेशी ब्रँडची सध्यातरी राज्यात खप होत नाही. हे महागडे मद्य पिणाऱ्यांची संख्या फार कमी आहे. त्यामुळे क्वचित ठिकाणी हे ब्रँड राज्यातील बार किंवा शॉप मध्ये आढळून येतात. मात्र, आता उत्पादन शुल्काच्या कपातीनंतर दरांमध्ये घट झाल्याने या बँडच्या किमती घटणार आहे. त्यामुळे छोटे दुकानदार व्यावसायिक सुद्धा हे महागडे ब्रँड विक्रीस ठेवता येणार असल्याचे दुकान मालक प्रदीप शेट्टी यांनी सांगितले.

नववर्षांपूर्वीच जर व्हिस्की स्कॉच चे दर घेतल्यास तळीरामांचे नववर्ष आणखी उत्साहात साजरा होणार आहे. शिवाय राज्य उत्पादन शुल्क विभागाचा महसूल सुद्धा वाढण्याची शक्यता दर्शवण्यात येत आहे. सध्या इतर राज्याच्या तुलनेत महाराष्ट्रात सर्वाधिक व्हिस्की स्कॉचचे दर आहे.

राज्य - लोकप्रिय ब्रॅण्डची 750 मिलीची किंमत (रू.)

महाराष्ट्र - 5,760

चंदीगढ - 2,200

दिल्ली - 2,800

प. बंगाल - 3,500

गोवा - 2,800

दमण व दिव - 3,000