मुंबई:  ड्रग्स तस्करीप्रकरणी तपास करणाऱ्या केंद्रीय अंमली पदार्थ विरोधी पथकाला (एनसीबी) कोकेन तस्करीत परदेशी तस्करांचा संबंध सापडला असून त्या अनुषंगाने तपास करण्यात येत आहे.

एनसीबीने दक्षिण मुंबईतील मोहम्मद अली रोड येथे छापा टाकून ब्रुनो जॉन न्ग्वाले या टान्झानियन नागरीकाला चार ग्रॅम कोकोनसह अटक केली होती. त्याच्या चौकशीतून मिळालेल्या माहितीवरून 4.40 ग्रॅम इक्स्टसी आणि 1.88 ग्रॅम एमडीएमए वर्सोवा येथून जप्त करण्यात आली. याप्रकरणी रोहित हिरे नावाच्या आरोपीलाही अटक करण्यात आली होती. ब्रुनो हा परदेशी नागरिक कोकेन वितरक असल्याची माहिती आतापर्यंतच्या चौकशीतून निष्पन्न झाली आहे. ही सर्व कोकेन परदेशातून कुरिअर मार्फत येत असल्याचे निष्पन्न झाले आहे.

अधिक वाचा-  मुंबईत 23 विभागात रुग्ण दुपटीचा दर 100 दिवसांच्या वर

या कोणत्याही व्यवहारात विक्रेत्याचा प्रत्यक्ष सहभाग येत नसल्यामुळे त्यांच्यापर्यंत पोहोचणे शक्‍य नसल्याचे अधिकाऱ्याने सांगितले. त्याच्या वितरणासाठी कुरियर सर्विसचा वापर होत असल्यामुळे ग्राहक आणि  विक्रेता यांच्यात कोणाताही संबंध उतर नाही. परिणामी आरोपींकडे पोहोचणे जवळपास अशक्य झाले आहे.

अधिक वाचा-  23 नोव्हेंबरपर्यंत वकिलांना लोकल प्रवासाची परवानगी, मध्य-पश्चिम रेल्वेची घोषणा

याशिवाय लोणावळा पोस्ट ऑफिस येथून हे पार्सल जप्त करण्यात आले असून याप्रकरणी दोघांना अटक करण्यात आली आहे. याप्रकरणी एक हजार 110 ग्रॅम गांजा जप्त करण्यता आला आहे. त्यातील तस्करीतही परदेशी टोळीशी संबंध निष्पन्न झाला आहे. परदेशातील गांजा येथील रेव्ह पार्ट्यांमध्ये मोठ्याप्रमाणात प्रचलित आहे. त्यामुळे परदेशी तस्करांच्या संबंधाबाबतही एनसीबी तपास करत आहे.

-------------------------------------

(संपादनः पूजा विचारे)

NCB to investigate foreign smugglers