Anil Gote

मुंबई- माजी आमदार तथा राष्ट्रवादी काँग्रेस पक्षाचे उपप्रदेश अध्यक्ष अनिल गोटे यांनी यांनी पक्षाला सोडचिठ्ठी दिली आहे. त्यामुळे धुळ्यात राष्ट्रवादी काँग्रेस पक्षाच्या शरद पवार गटाला मोठा धक्का बसलाय. पक्षाच्या अंतर्गत गटबाजीला कंटाळून पक्षश्रेष्ठींकडे आपला राजीनामा सोपविला असल्याचं गोटे म्हणाले. तसेच सध्यातरी कुठल्याही पक्षात जाणार नसल्याचे ते म्हणाले होते. यावर राष्ट्रवादी काँग्रेसते नेते एकनाथ खडसे यांनी प्रतिक्रिया दिली आहे.

अनिल गोटे यांच्या राजीनाम्यानंतर फार आश्चर्य वाटलं नाही. त्यांचा स्वतंत्र पक्ष आहे. राष्ट्रवादीत आल्यावर त्यांनी कुणाला प्राध्यान्य दिले नाही. पण, नेमकं कशामुळे ते राजीनामा देत आहेत हे मला माहिती नाही, असं खडसे म्हणाले. धुळ्यात पत्रकार परिषद घेऊन गोटे यांनी आपली भूमिका स्पष्ट केली होती. गोटे यांनी राष्ट्रवादी काँग्रेसचे प्रदेशाध्यक्ष जयंत पाटील यांच्याकडे राजीनामा सुपुर्द केला होता.

दरम्यान, एकनाथ खडसे यांनी पत्रकार परिषदेत विविध विषयांवर भाष्य केलं. काल माननीय पंतप्रधान नरेंद्र मोदी यांनी भारतीय जनता पार्टीच्या खासदारांची बैठक आयोजित केली होती. त्यांनी ते जे सांगितलं ते असत्य आहे. 2014 ला शिवसेनेने युती तोडली असं ते म्हणाले. मी त्यावेळेस विरोधी पक्षनेता होतो. काँग्रेस-राष्ट्रवादीच्या विरोधात वातावरण झालं होतं. त्यावेळेस भाजप सेनेचे सरकार येईल असा विश्वास आम्हाला होता. त्यावेळेस अनेक लोकं भाजपमध्ये यायला लागले होते, तिकीट मागायला लागले होते, असं ते म्हणाले.

भाजपने एकट्याने निवडणुका लढवाव्या असे सर्वांचे मत झालं. 2 अडीच महिन्यापूर्वी हा निर्णय झाला आणि भाजपने युती तोडली. त्यावेळी सुधिर मुनगंटीवार, देवेंद्र फडणवीस आणि मी पण होतो. त्यावेळेस हे कोणी आणि कसं सांगावं यावर आमच्यात खल झाला. त्यावेळेस माझ्यावर जबाबदारी सोपवण्यात आली. मी उद्धव ठाकरे यांना फोन करून तसं सांगितलं. जागा वाटपावरून जमत नसल्याचे कारण सांगून मी ती युती तोडली, असा खुलासा खडसे यांनी केला.