मुंबई: "सकाळी मोठा पाऊस झाला. भरतीची वेळ होती. त्यावेळी शहरात पाणी साचलं होतं. आता पाणी भरलेलं (water logging) नाही. निचरा झालेला आहे. मुंबईत पाणी भरणार नाही असा दावा केलेला नाही. करणार नाही. पाणी भरल्यानंतर चार तासाच्या आता पाण्याचा निचरा झाला नाही, तर केलेलं काम चांगलं नाही, असं म्हणू शकतो" असं मुंबईच्या महापौर किशोरी पेडणेकर (kishori pednekar) म्हणाल्या. मोसमातील पहिल्याच पावसाचा (mumbai rain) मुंबईला फटका बसला आहे. सखल भागासह ठिकठिकाणी मुंबईत पाणी साचलं होतं. त्यामुळे मुंबईच्या वेगाला ब्रेक लागला. पाणी तुंबल्यामुळे विरोधी पक्षांनी मुंबई महापालिकेतील (bmc) सत्ताधारी शिवसेनेवर टीका केली. (Not more than four hours water logging in mumbai mumbai mayor kishori pednekar)

"मुंबईच्या पलीकडे पुण्यातही पाणी तुंबलय. जे पाणी साचलं ते चार तासांच्यावर शहरात थांबत नाहीय. १९५ मीमी, १३७ मीमी पाऊस झाला. ८५ मीमी पाऊस झाला असता, तर ते भूमिगत टाक्यांमध्ये ते पाणी वळवता आलं असतं. सकाळपासून पाऊस सुरु होता. समुद्राचे दरवाजे बंद होते. आता पावसाच्या पाण्याचा निचरा झाला आहे. दोन-तीन ठिकाणी पाणी आहे. ते गुडघ्याच्या खाली आहे. काही नाले समुद्राच्या खूपच खाली आहेत. ज्या उपयोजना २००५ पासून करत आलो. त्यामुळे आधी मुंबई २ ते पाच दिवस ठप्प व्हायची. आता तसं होत नाही" असे महापौर म्हणाल्या.

"हिंदमाताला पाणी भरलं तरी पुलावरुन जाणारं ट्रॅफीक सुरळीत सुरु आहे. आम्ही आताच्या घडीला लक्ष ठेवून आहोत. निष्काळजीपणा दिसेल तिथे कारवाई करु, असे महापौरांनी सांगितले. विरोधी पक्षांनी केलेल्या टीकेवर त्या म्हणाल्या की, त्यांना जे आरोप करायचे ते करुं दे. त्यांच्या आरोपांना उत्तर द्यायला बसलेलो नाही. त्यांच्या प्रशस्तीपत्रकाची गरज नाही. निंदकाचे घर असावे शेजारी, जे आवश्यक आहे ते सर्व करु" असे महापौर म्हणाल्या.