मुंबई : नायर रुग्णालयात लहान मुलांवरील कोवोवॅक्स लसीच्या ट्रायलला सुरूवात झाली आहे. गुरुवार पर्यंत 18 मुलांवर लसीची चाचणी घेण्यात आली आहे. मात्र दिवाळीच्या सुट्टीत सहलीला तसेच गावी उत्सव साजरा करण्यासाठी गेलेल्या पालक- मुलांमुळे या ट्रायलसाठीचा प्रतिसाद आणखी घटला आहे.गेल्या आठवड्याभरात एका ही मुलाची नोंदणी झाली नाही.

पालिकेच्या नायर रुग्णालयाची निवड कोवोवॅक्सच्या लसीच्या चाचणीसाठी केली. लसीची ट्रायल सुरू झाली आहे.पालिकेच्या नायर रुग्णालयात 2 ते 17 वयोगटातील 920 मुलांवर ही ट्रायल घेण्यात येणार आहे. 15 दिवसात 15 मुलांवर ही चाचणी करण्यात आली. त्यानंतर आठ दिवसात केवळ 3 मुलांची चाचणी करण्यात आली आहे. दिवाळीच्या सुट्टीचा आनंद घेण्यासाठी सहली तसेच गावी गेलेल्या नागरिकांमुळे ही घट झाली आहे.

लहान मुलांच्या लसीकरणाच्या चाचणीसाठी नवीन नियमावली बनवण्यात आली आहे. 2 ते 18 वर्षे वयोगटासाठी तीन गट बनवण्यात आले आहेत. यामध्ये 2 ते 7 वर्षे, 8 ते 11 आणि 12 ते 18 वर्षे असे वयोगट तयार करण्यात आला आहे.

मुलांच्या लसीकरणाच्या ट्रायलसाठी नोंदणी सुरू आहेत . दिवाळीमुळे हा प्रतिसाद कमी झाला आहे. मात्र दिवाळीपूर्वी पालक लसीसाठी विचारणा करत होते. दिवाळीनंतर प्रतिसाद वाढेल असे डॉ.रमेश भारमल,संचालक,वैद्यकीय शिक्षण व पालिका प्रमुख रुग्णालय यांनी सांगितले.