मुंबई - मालेगाव बाँबस्फोट खटल्यातील प्रमुख आरोपी, खासदार साध्वी प्रज्ञासिंह ठाकूर यांना विशेष न्यायालयाकडून बुधवारी दिलासा मिळाला नाही. खटल्याच्या सुनावणीला कायम गैरहजर राहण्याची त्यांची मागणी न्यायालयाने फेटाळली.

प्रज्ञासिंह यांनी विशेष एनआयए न्यायालयात सुनावणीला गैरहजर राहण्यासाठी अर्ज केला होता. लोकसभेच्या कामानिमित्त संसदेत हजेरी लावायची आहे. त्याशिवाय मुंबई ते भोपाळ असा प्रवास प्रकृतीमुळे झेपत नाही. त्यामुळे खटल्याच्या सुनावणीला कायमचे गैरहजर राहण्याची परवानगी द्या, अशी मागणी त्यांच्या वतीने अर्जाद्वारे केली होती. ती न्यायालयाने अमान्य केली.

सध्या मालेगाव बाँबस्फोट खटल्याची सुनावणी विशेष एनआयए न्यायालयात सुरू आहे. या खटल्याला सर्व आरोपींनी आठवड्यातून किमान एक दिवस हजेरी लावावी, असे निर्देश न्यायालयाने दिले आहेत. प्रज्ञासिंह यांना मुंबई उच्च न्यायालयाने प्रकृतीच्या कारणास्तव जामीन मंजूर केला आहे. एनआयएने दाखल केलेले आरोप हटवण्यासाठी त्यांनी न्यायालयात याचिका दाखल केली आहे.