मुंबई: महाराष्ट्राचे मुख्यमंत्री उद्धव ठाकरे यांनी दोन दिवसांपूर्वी संपूर्ण लॉकडाउनचा इशारा दिला. 'हे बंद करा, ते बंद करा ही आपली भूमिका नाही. पण येणाऱ्या बिकट परिस्थितीवर वेळीच मात करण्यासाठी आतापासूनच प्रयत्न करावे लागतील. त्यामुळे आता जिंदगी, जान, उसके बाद काम या पद्धतीने जावे लागेल', असे मुख्यमंत्री उद्धव ठाकरे यांनी सांगितले. लोकांची मात्र सध्या मानसिकता वेगळी आहे. जर लॉकडाउन झालं तर आर्थिक गणितं बिघडतील आणि त्याचा थेट परिणाम आयुष्यावर होईल अशी भावना व्यक्त होत आहे. परंतु मुख्यमंत्री लॉकडाउनच्या निर्णयावर ठाम असल्याचे दिसत आहेत. याच मुद्द्यावरून मनसेचे संदीप देशपांडे यांनी मुख्यमंत्र्यांची तुलना ब्रिटीश अधिकारी रँड यांच्याशी केली.

'लॉकडाउनमध्ये कृष्णकुंज मंत्रालय होतं, हे मुख्यमंत्र्यांनी लक्षात ठेवावं'

१८९७ साली देशात प्लेगची साथ आली होती. त्यावेळी ब्रिटीशांची राजवट होती. लोक साथीच्या आजाराने जीव गमावत होते. पण तेव्हाचा ब्रिटीश अधिकारी रँड हा जनतेवर अन्याय-अत्याचार करत होता. जनतेची काळजी न करता केवळ आपले निर्णय जनतेवर लादण्याचे काम ब्रिटीश राजवटीत केले जात होते. त्याचाच दाखला देत संदीप देशपांडे यांनी उद्धव ठाकरे यांच्यावर टीका केली. '१८९७ साली प्लेगची साथ आली त्यावेळी रँड ने लोकांवर कशाप्रकारचे अत्याचार केले याचा अनुभव राज्यातील जनता सध्याच्या काळात घेत आहेत', असं ट्वीट त्यांनी केलं.

जिंदगी, जान उसके बाद काम - मुख्यमंत्री उद्धव ठाकरे

दरम्यान, लॉकडाउन हा महाराष्ट्रातील जनतेला परवडणारा नाही. काँग्रेस आणि राष्ट्रवादी काँग्रेसचाही लॉकडाउनला विरोध आहे हे मुख्यमंत्र्यांनी ध्यानात घ्यावे. आनंद महिंद्रा यांनी आरोग्य सुविधा वाढवण्याचा सल्ला दिला होता. त्यावर मुख्यमंत्र्यांनी ५० डॉक्टर, नर्स, आरोग्यसेवक उपलब्ध करुन द्या, असे उत्तर दिले. मुख्यमंत्र्यांनी एक गोष्ट लक्षात ठेवली पाहिजे की लोक स्वत:हून सरकारला मदत करायला म्हणून समोर आले. प्रादुर्भाव कमी झाल्यावर त्यांना कामावर काढून टाकलं. आता लोकांच्या मनातील विश्वासार्हता कमी झाली आहे. म्हणून तुम्हाला डॉक्टर, आरोग्यसेवक मिळत नाहीत, अशा शब्दात संदीप देशपांडे यांनी ठाकरे यांना सुनावले होते.