नवी दिल्ली : महाराष्ट्रातून इसिस या आंतरराष्ट्रीय दहशतवादी संघटनेचं मॉड्युल चालवणारा साकीब नाचन याला दोन दिवसांपूर्वी एनआयए आणि एटीएसनं ताब्यात घेतलं आहे. त्याच्याकडं केलेल्या प्राथमिक चौकशीत अनेक धक्कादायक बाबींचा खुलासा झाला आहे. नाचन हा परदेशातील इसिसच्या तीन हँडर्सच्या संपर्कात असल्याचं समोर आलं आहे. (Sakib Nachan in contacted with foreign handlers of ISIS NIA investigation revealed shocking info)

ठाणे जिल्ह्यातील पडघा इथल्या बोरिवली गावात साकीब नाचन राहत होता. या पडघ्यात दोन दिवसांपूर्वी शनिवारी राष्ट्रीय तपास एजन्सी आणि दहशतवादविरोधी पथकानं छापेमारी केली होती. तसेच साकीब नाचन आणि त्याच्या मुलाला ताब्यात घेतलं होतं. त्यानंतर त्याच्याकडून चौकशी करण्यात येत आहे. दहशतवादी कारवायांमध्ये सहभागी होण्यासाठी नाचनच्या सांगण्यावरुन ब्रेनवॉश केलेले तरुण बोरिवलीत येत होते.

नाचनसह इतर १४ लोकांना एनआयएनं ताब्यात घेतलं होतं. त्यानंतर त्यांना दिल्लीतील पटियाला कोर्टात दाखल करण्यात आलं होतं. या कोर्टात या सर्वांना १४ दिवसांची पोलीस कोठडी सुनावण्यात आली आहे. यानंतर केलेल्या चौकशीत हे देखील समोर आलं आहे की, साकीब नाचन हा घाटकोपर इथल्या ट्रेनमधील स्फोटाशी संबंधित आहे. तसेच त्यांच्याकडं स्फोटकंही सापडली होती. या प्रकरणात दहा वर्षांची शिक्षा भोगून आल्यानंतर तो २०१७ मध्ये पडघ्यातील बोरिवली इथं परतला होता.

यानंतर तो इसिसच्या मॉड्युलं चालवत होता दरम्यान तो परदेशातील काही हँडलर्सच्या संपर्कात होता. इसिससाठी आम्ही काम करु अशी शपथ घेऊन काही तरूण त्याच्यासोबत सामिल झाले होते. पण यामध्ये किती तरुण सहभागी होते आणि किती जणांनी काही दहशतवादी कारवायांमध्ये सहभाग घेतला होता का? याची चौकशी केली जात आहे.