मुंबई : भाजपच्या (BJP) कोणत्याही नेत्याला मी भेटलो नाही. मलाही कोणी भेटलेले नसल्याचे सांगत राष्ट्रवादी काँग्रेस पार्टी शरदचंद्र पवार पक्षाचे प्रदेशाध्यक्ष जयंत पाटील (Jayant Patil) यांनी भाजप प्रवेशाच्या चर्चेत काही तथ्य नसल्याचे स्पष्ट केले.

तसेच लोकसभा निवडणुकीसाठी (Loksabha Election) वंचित बहुजन आघाडीचे नेते बाळासाहेब आंबेडकर यांच्या सोबत चर्चा सुरू असून, पुढील आठ दिवसांत जागावाटप निश्चित केले जाईल, अशी माहितीही त्यांनी दिली. पाटील म्हणाले, ‘‘माझा भाजपच्या कोणाशीही संपर्क झालेला नाही. चर्चा झालेली नाही. भाजपच्या दिल्लीतील वरिष्ठांबरोबर चर्चा झाली असल्याचे सांगण्यात येत असले तरी त्यात काहीही तथ्य नाही. कारण गेले अनेक महिने मी दिल्लीला गेलेलो नाही. त्यामुळे कोणाची भेट घेण्याचा प्रश्नच येत नाही.’’

‘‘राज्याच्या मंत्रिमंडळात मागील १७ ते १८ वर्षांपासून काम केले आहे. त्यामुळे भाजपमध्ये जाण्यासाठी मंत्रिपद हे एकमेव प्रलोभन असू शकत नाही, अशी टिपणीही त्यांनी केली. आगामी लोकसभा निवडणुकीबाबत बोलताना ते म्हणाले, आमच्या पक्षात फाटाफूट झाली आहे. तरीही आम्ही तरुणांना सोबत घेऊन चांगली कामगिरी करण्याचे नियोजन करत आहोत.’’

चर्चा घडवून आणणारा शोधा

ज्येष्ठ नेते शरद पवार यांचे निष्ठावंत असलेला पश्चिम महाराष्ट्रातील बडा नेता भाजपत जाणार असल्याची चर्चा दिवसभर सुरू होती. त्याला भाजपच्या नेत्यांनीही दुजोरा दिला होता. या चर्चेचा रोख जयंत पाटील यांच्याकडे होता. त्यामुळे पाटील यांनी आज पत्रकार परिषद घेत ही चर्चा जाणीवपूर्वक केली जात असल्याचे सांगून आता पत्रकारांनीच अशी चर्चा कोण घडवून आणत आहे, याचा शोध घेण्याची सूचना त्यांनी केली.