मुंबई : केंद्रीय अर्थमंत्री निर्मला सीतारामन यांनी आज लोकसभेत अर्थसंकल्प सादर केला. अर्थमंत्र्यांनी अर्थसंकल्पात केलेल्या घोषणांबाबत समाजमाध्यमावर अनेक विनोदी प्रतिक्रिया उमटल्या. अर्थमंत्र्यांनी प्राप्तिकरामध्ये केलेल्या बदलामुळे सर्वसामान्य करदात्यांच्या उडालेल्या गोंधळाच्या प्रतिक्रिया मीम्स, विनोदी ट्विट्‌स आणि व्यंगचित्रांद्वारे मांडण्यात आल्या. 

महत्वाची बातमी ः सीएएविरोधातील नागपाड्यातील आंदोलन अखेर मागे

प्राप्तिकराच्या स्लॅबमध्ये सर्वसामान्य नागरिकांना करदिलासा मिळेल, अशी अपेक्षा असताना प्रत्यक्षात फारसा फायदा होणार नसल्याच्या प्रतिक्रिया व्यक्त केल्या जात आहे. नव्या टॅक्‍सस्लॅब हा पर्यायी असून त्याची निवड केल्यास पूर्वीच्या तब्बल 70 करसवलतींवर पाणी फेरावे लागेल, अशी माहिती तज्ज्ञांनी व्यक्त केली. त्यामुळे करदात्यांमध्ये संभ्रमावस्था आहे. त्याबाबत काही लोकांनी समाजमाध्यमांवर मीम्स बनवत त्याची खिल्ली उडवली आहे. "अपेक्षा आणि वास्तव' या मथळ्याखाली अनेकांनी वेगवेगळ्या प्रकारे मीम्स बनवले. अर्थमंत्र्यांनी मांडलेला अर्थसंकल्प हा समजण्यापलीकडे असल्याचे सांगणारे गमतीशीर ट्विट्‌स आणि मीम्स मोठ्या प्रमाणात व्हायरल झाले.

महत्वाची बातमी ः गॅसवाहिनीच्या परिसरात राहणे घातकच : न्यायालय

आमीर खानच्या "गजनी' चित्रपटातील काही दृश्‍यांचा वापर करत अर्थसंकल्प समजून घेतानाचे मीम्ससुद्धा व्हायरल झाले होते. त्याशिवाय अनेक सनदी लेखापालांनाही अर्थसंकल्प समजण्यापलिकडे असल्याचे सांगणारे विनोद अनेकांनी पोस्ट केलेत. त्याशिवाय अनेक व्यंगचित्रकारांनी अर्थसंकल्पावर भाष्य करणारे व्यंगचित्र रेखाटले. त्यामध्ये विशेषतः प्राप्तिकररचनेबाबत सर्वसामान्य करदात्यांचा झालेला गोंधळ व्यक्त करण्यात आला. त्याशिवाय अर्थमंत्र्यांनी आपल्या भाषणामध्ये काही शब्दांचा वापर अनेकवेळा केला. त्यामध्ये "टॅक्‍स' हा शब्द त्यांनी 132 वेळा, तर "भारत' हा शब्द 72 वेळा वापरला. त्याबाबतही अनेकांनी आपल्या प्रतिक्रिया व्यक्त केल्या. जेवढ्या वेळा "टॅक्‍स' शब्दांचा वापर केला, तेवढ्या वेळा अर्थमंत्र्यांनी करप्रणाली समजून सांगावी, असा खोचक मागणी काही जणांनी समाजमाध्यमावर केली. त्याबाबतचे मीम्ससुद्धा फार मजेशीर होते.