मुंबई : संप मागे घेऊन कोणतीही चर्चा करणार नाही. आता माघार नाही. सन्मानपूर्वक तोडगा निघत नाही तोवर संप सुरूच ठेवणार असल्याचा निर्धार व्यक्त करत कृती समितीचे नेते शशांक राव यांनी, संप चिरडण्याचा प्रयत्न झाल्यास त्यांना त्यांची जागा दाखवू, असा इशारा दिला. परळ येथील शिरोडकर हायस्कूलमध्ये आज झालेल्या कामगार मेळाव्यात कामगारांनी एकजूटीने लढण्याचा निर्धार व्यक्त केला. 

उद्या प्रत्येक आगारातून खासगी गाड्या चालविण्यात येणार आहेत. हा प्रकार संप चिरडण्याचा असून एकही गाडी चालू द्यायची नाही. हमसे जो टकराएगा मिट्टी में मिल जाएगा, असा इशारा राव यांनी प्रशासनाला दिला. उच्च न्यायालयाने कामगारांच्या बाबतीत सहानुभूतीपूर्वक निर्णय घेतला आहे. संपावर जाण्यास बंदी घातलेली नाही. त्यामुळे सोमवारी त्रिसदस्यीय समितीने बोलवलेल्या चर्चेला जाणार आहे. विलीनीकरणाला पालिका आयुक्तांनी विरोध केला आहे. आयुक्त कामगारांना विरोध करत असतील, तर आम्ही त्यांना सहकार्य का करायचे? असा सवाल राव यांनी केला. लेखी आश्‍वासन न देता आयुक्त, बेस्टचे महाव्यस्थापक वेठीस धरीत असल्याचा आरोप त्यांनी केला. 

विविध कामगार संघटनांचा पाठिंबा 
बेस्ट कर्मचाऱ्यांच्या संपाला पालिका कर्मचाऱ्यांच्या म्युनिसिपल मजदूर युनियन संपात सहभागी होणार असून बेस्टच्या विद्युत विभागातील कामगार, पालिकेतील अभियंते संपात सहभागी झाले आहेत. आता अखिल भारतीय बंदर व गोदी कामगार महासंघाचे ऍडव्होकेट एस. के. शेट्टे, सुधाकर अपराज, मुंबई पोर्ट ट्रस्ट ऍण्ड जनरल एम्प्लॉईज युनियनचे सरचिटणीस मारुती विश्वासराव, बृहन्मुंबई राज्य सरकारी कर्मचारी संघटनेचे सरचिटणीस अविनाश दौड आदींनी या संपास पाठिंबा दिला आहे.