मुंबई - मुंबई महानगर क्षेत्रातील अकरावी ऑनलाईन प्रवेशाची सर्वसाधारण गुणवत्ता यादी शुक्रवारी रात्री उशिरा प्रसिद्ध झाली. या यादीत ९० टक्केहून अधिक गुण मिळालेल्यांमध्ये सीबीएसई, आयसीएसई आणि इतर मंडळांतील विद्यार्थ्यांचा समावेश आहे. केंद्रीय मंडळातील विद्यार्थ्यांच्या तुलनेत राज्य मंडळातील विद्यार्थ्यांची संख्याही खूपच कमी असल्याने नामवंत महाविद्यालयांमध्ये पहिल्या यादीत याच मंडळातील विद्यार्थ्यांचे वर्चस्व राहणार असल्याचे स्पष्ट झाले आहे.

मुंबई विभागीय शिक्षण उपसंचालक कार्यालयाने अकरावी प्रवेशाची यादी जाहीर करण्यातही विलंब केला. अकरावी प्रवेशासाठी एक लाख ८५ हजार १७३ अर्ज आले होते. यामध्ये राज्य मंडळातील विद्यार्थ्यांची संख्या एक लाख ६८ हजार ९९१ आहे; तर सीबीएसई, आयसीएसई, आयसीसीएसई, आयबी आणि इतर मंडळांतील १९ हजार ४८२ विद्यार्थ्यांनी अर्ज केले आहेत. सर्वसाधारण गुणवत्ता यादीमध्ये ९५ टक्केहून अधिक गुण मिळालेल्या एक हजार ४८७ विद्यार्थ्यांनी अर्ज केले आहेत. यामध्ये राज्य मंडळातील विद्यार्थ्यांची संख्या केवळ ३०१ आहे; तर इतर मंडळांतील विद्यार्थ्यांची संख्या एक हजार १८६ आहे. त्यामुळे इतर मंडळांतील विद्यार्थ्यांची संख्या अधिक असल्याने राज्य मंडळातील गुणवंत विद्यार्थ्यांचा प्रवेशाचा मार्ग खडतर बनला आहे.

विद्यार्थ्यांनी आपल्या लॉगीनमध्ये जाऊन यादी तपासावी, यामध्ये काही बदल असल्यास संपर्क साधावा, असे आवाहन उपसंचालकांनी केले आहे.