उल्हासनगर : विठ्ठलवाडी पोलीस ठाण्याच्या हद्दीत दरवाजाला बाहेरून कुलूप आणि आत पुजाऱ्याचा लटकलेला संशयास्पद मृतदेह आढळून आला आहे.त्यामुळे ही आत्महत्या की हत्या हा प्रश्न पोलिसांसमोर उभा ठाकला असून त्यासाठी पोस्टमार्टेम रिपोर्टवर पोलिसांचा तपास अवलंबून आहे.

उल्हासनगर कॅम्प 4 ओटी सेक्शन मधील पूज्य पंचायत हॉलच्या बाजूला असणाऱ्या सुमन अपार्टमेंटच्या सहाव्या मजल्यावर जितू शर्मा हा 38 वर्षीय अविवाहित पुजारी राहत होता.गुरुवार पासून या फ्लॅटच्या दरवाजाला बाहेरून कुलूप होते.आज या फ्लॅट मधून अचानक मोठ्या प्रमाणात दुर्गंधी येत असल्याने इमारतीतील रहिवाश्यांनी जितूचा भाऊ अमित शर्माला फोन करून सांगितले.अमितने विठ्ठलवाडी पोलिस ठाणे गाठत पोलिसांना माहिती देताच पोलिसांनी सुमन अपार्टमेंट गाठले.

वरिष्ठ पोलीस निरीक्षक कन्हैया थोरात यांच्या उपस्थितीत पोलिसांनी कुलूप तोडून घरात पाहिले असता जितू शर्मा याचा मृतदेह लटकलेल्या अवस्थेत होता. पोलिसांनी हा मृतदेह ताब्यात घेत शवविच्छेदनासाठी शासकीय रुग्णालयात पाठवला.बाहेरून कुलूप आणि आत लटकलेल्या अवस्थेत मृतदेह हा प्रकार संशयास्पद असला तरी पुजारी जितू शर्मा याने आत्महत्या केली की त्याची हत्या करण्यात आली हे पोस्टमार्टेम रिपोर्ट आल्यानंतर स्पष्ट होणार असल्याची माहिती विठ्ठलवाडी ठाण्याचे वरिष्ठ पोलीस निरीक्षक कन्हैय्या थोरात यांनी दिली.