काल्हेर ग्रामपंचायत सरपंचपदी भावना पाटील भिवंडी, ता. ३ (बातमीदार) ः भिवंडी तालुक्यातील काल्हेर ग्रामपंचायत सरपंचपदी भावना सुजित पाटील यांची बिनविरोध निवड करण्यात आली आहे. यावेळी उपस्थित ग्रामपंचायत सदस्य व भाजप पदाधिकारी, कार्यकर्त्यांनी पुष्पगुच्छ देऊन त्यांचे अभिनंदन केले आहे. काल्हेर गावच्या सरपंच योगिता म्हात्रे यांचा कार्यकाल संपुष्टात आल्याने सरपंच पदाची निवडणूक ग्रामपंचायत कार्यालयात आयोजित करण्यात आली होती. पंचायत समितीचे विस्तार अधिकारी इंद्रजित काळे यांच्या अध्यक्षतेखाली आयोजित करण्यात आलेल्या सरपंच पदाच्या निवडणुकीत एकच उमेदवारी अर्ज सादर करण्यात आल्याने ग्रामपंचायत सदस्या भावना पाटील यांची बिनविरोध केल्याची घोषणा त्यांनी केली. यावेळी पंचायत समितीचे सभापती महेंद्र पाटील, माजी सरपंच श्रीधर पाटील, नीलेश गुरव, संजय पाटील, समाजकल्याण न्यास संस्था अध्यक्ष सोन्या पाटील, हरिश्चंद्र पाटील आदी उपस्थित होते.