राज्य सरकार आणि महापौरांना नोटीस शेलार यांच्या याचिकेवर न्यायालयाची कारवाई सकाळ वृत्तसेवा मुंबई, ता. १३ : वरळी येथे झालेल्या सिलिंडर स्फोट प्रकरणानंतर भाजपचे नेते आशीष शेलार यांनी उच्च न्यायालयात जनहित याचिका केली होती. शेलार यांच्या याचिकेवर मुंबई उच्च न्यायालयाने आज राज्य सरकार आणि महापौर किशोरी पेडणेकर यांना नोटीस बजावली आहे. शेलार आणि महापौर पेडणेकर जबाबदार नागरिक आणि नेते आहेत. त्यांनी आपापसातील वाद सामंजस्याने मिटवायला हवेत, असे मत न्यायालयाने व्यक्त केले. सिलिंडर स्फोटानंतर शेलार यांनी महापौरांवर टीका केली होती. यामध्ये त्यांनी काही आक्षेपार्ह शब्दांचा उल्लेख केला होता. याबाबत पेडणेकर यांनी पोलिस ठाण्यात गुन्हा दाखल केला आहे. हा गुन्हा रद्द करण्यासाठी शेलार यांनी उच्च न्यायालयात याचिका केली आहे. न्या. प्रसन्न वराळे आणि न्या. अनिल किल्लोर यांच्या खंडपीठाने राज्य सरकार आणि पेडणेकर यांना नोटीस बजावली असून दोन आठवड्यांत भूमिका स्पष्ट करण्याचे निर्देश दिले आहेत.