बारावे कचरा वर्गीकरण प्रकल्पाला आग

चौकशी करण्याचे कल्याण-डोंबिवली पालिकेचे पोलिसांना पत्र

कल्याण, ता. १ (बातमीदार) : कल्याण पश्चिमेला असलेल्या महापालिकेच्या बारावे सुका कचरा वर्गीकरण प्रकल्पाला पहाटेच्या सुमारास भीषण आग लागली. आग विझविण्यासाठी शुक्रवारी उशिरापर्यंत अग्निशमन दलाचे प्रयत्न सुरू आहे. शहरात डम्पिंग ग्राऊंड आणि कचरा प्रकल्पाला वारंवार आग लागण्याच्या घटना वाढल्याने पालिकेच्या घनकचरा विभागाने खडकपाडा पोलिसांना पत्र देत चौकशी करत दोषींविरोधात गुन्हे दाखल करण्याची मागणी केली आहे.

कल्याण-डोंबिवली महापालिकेच्या आधारवाडी डम्पिंग ग्राऊंडच्या वाडेघरच्या दिशेने असलेल्या डम्पिंग ग्राऊंडला १२ मार्च आणि २४ मार्च रोजी आग लागली होती. या घटनेबाबत संशय व्यक्त करत पालिका उपायुक्त डॉ. रामदास कोकरे यांनी खडकपाडा पोलिस ठाण्यास पत्र दिले होते. त्या आगीचे प्रकरण ताजे असताना आज (ता. १) पहाटे तीन वाजेच्या सुमारास बारावे येथील सुका कचरा वर्गीकरण प्रकल्पाला आग लागली. या ठिकाणी सुका कचरा असल्याने आग वाढली असून परिसरात धूर पसरला. घटनेची माहिती मिळताच पालिकेच्या अग्निशमन दलाच्या पाच गाड्या आणि काही पाण्याचे टँकर घटनास्थळी धाव घेतली होती. दुपारी बारा तासानंतरही आग विझविण्यासाठी शर्थीचे प्रयत्न सुरू होते. नेमकी आग कशामुळे लागली, हे स्पष्ट झालेले नाही.