मुंबादेवी, ता. ७ (बातमीदार) ः न्यायालयाने दिलेल्या आदेशानुसार एसटी कामगारांच्या काही मागण्या मान्य झाल्याने गुरुवारी आझाद मैदानात त्यांनी विजयोत्सव साजरा केला. कामगारांनी आपले नेते ॲड. गुणरत्न सदावर्ते यांचे ढोल-ताशांच्या गजरात गुलाल उधळून राजेशाही थाटात निर्णयाचे स्वागत केले. ‘एक मराठा... लाख मराठा’, ‘जय श्रीराम’च्या घोषणांनी आझाद मैदान दणाणून गेले होते. जवळपास पाच हजार कामगार जल्लोषात सहभागी झाले होते.

पाच महिन्यांपासून विविध मागण्यांसाठी आंदोलन करीत असलेल्या एसटी कामगारांच्या काही मागण्या उच्च न्यायालयाच्या निर्देशानुसार राज्य सरकारने गुरुवारी मान्य केल्या. एसटी कामगारांना पेन्शन, ग्रॅच्युईटी आणि बोनस देण्याचे सरकारने जाहीर केले. २२ एप्रिलपर्यंत कामावर हजर राहण्याचे आवाहन त्यांना करण्यात आले आहे. ॲड. गुणरत्न सदावर्ते म्हणाले, की न्यायालयात निकालाचे वाचन सुरू असून त्याची प्रत मिळाल्याशिवाय आंदोलनाबाबत मी काहीही बोलणार नाही. निकालपत्रात एसटीच्या विलगीकरणाबाबत स्पष्टपणे नमूद करीपर्यंत एकही एसटी कामगार कामावर हजर होणार नाही. सरकारने दिलेली डेडलाईन आम्ही पाळत नाही. आम्हाला आदेश देणारे हे कोण, असा सवालही त्यांनी केला. निकालपत्र वाचल्याशिवाय एकही कामगार आझाद मैदान सोडणार नाही, असेही त्यांनी स्पष्ट केले.

छत्रपती शिवाजी महाराज की जय, जय भवानी जय शिवाजी, जय जिजाऊ... जय रमाई, डॉ. बाबासाहेब आंबेडकरांचा विजय असो, एक मराठा... लाख मराठा आणि जय श्रीरामच्या घोषणांनी आझाद मैदान दणाणून गेले होते. आझाद मैदानात जवळपास पाच हजार कामगार उपस्थित होते. पोलिसांचा कडेकोट बंदोबस्त ठेवण्यात आला होता. उपोषणाला बसलेल्या २५ कामगारांना ॲड. गुणरत्न सदावर्ते आणि अॅड. जयश्री पाटील यांनी लिंबूसरबत पाजून त्यांचे उपोषण सोडले.

...तोपर्यंत संप सुरूच
न्यायालयाच्या आदेशानंतर आज एसटी कर्मचारी संप मागे घेतील अशी अपेक्षा होती; मात्र कामगारांची बाजू न्यायालयात मांडणारे वकील गुणरत्न सदावर्ते यांनी आझाद मैदानावर एक वेगळीच भूमिका मांडली. न्यायालयाच्या आदेशाची प्रत वाचत नाही तोपर्यंत संप मागे घेणार नाही, अशी माहिती त्यांनी आज पत्रकार परिषदेत दिली.