पाली, ता. १० (वार्ताहर) ः पाली शहराला थेट अंबा नदीतून कोणतीही शुद्धीकरण प्रक्रिया न करता पाणीपुरवठा केला जातो. सध्या अंबा नदीचे पाणी मोठ्या प्रमाणात गढूळ व दूषित झाले आहे. शहरातील जलवाहिन्या जुन्या झाल्‍या असून, आतून गंजल्या आहेत. काही दिवसांपासून पालीकरांना गढूळ व काळ्या पाण्याचा पुरवठा होत असल्‍याने बल्‍लाळेश्‍वराच्या दर्शनासाठी येणारे भाविक व नागरिकांचे आरोग्य धोक्यात आले आहे.
खडकआळी येथील नळांना महिनाभरापासून काळ्या रंगाचे दूषित पाणी येत आहे. नळाला पाणी आल्यावर सुरुवातीचे काही वेळ काळे पाणी येते, त्यानंतर थोडे स्वच्छ पाणी येते. मध्यंतरी बल्लाळेश्वर नगर, प्रबुद्ध नगर आदी ठिकाणीही गढूळ, शेवाळेयुक्‍त पाणी येत होते. अशुद्ध व दूषित पाण्यामुळे नागरिकांचे आरोग्‍य धोक्‍यात आले आहेत. यावर उपाययोजना म्हणून नगर पंचायतीतर्फे उन्हेरे धरणातील पाणी अंबा नदीमध्ये सोडण्यात आले आहे, मात्र तरीही नळांना येणारे पाणी गढूळ असल्‍याने नागरिकांमधून संताप व्यक्‍त होत आहे.

शुद्धीकरण प्रक्रिया न करताच पुरवठा
अंबा नदीत मोठ्या प्रमाणात सांडपाणी, कंपन्यांमधील प्रदूषित पाणी, कचरा टाकला जातो. तसेच वाळू उपसाही होतो, शिवाय शुद्धीकरण प्रक्रिया न करताच थेट नळाद्वारे पाणी सोडण्यात येत असल्‍याने नागरिक व जीवसृष्टीचे आरोग्य धोक्यात आले आहे. कंपन्यांमधील दूषित रसायनयुक्त पाणी आणि सांडपाणी प्रक्रिया न करताच थेट अंबा नदीपात्रात सोडण्यात येते. किनाऱ्यालगतच्या गावांतील महिला नदीवर धुणीभांडी करतात. नदीत टाकलेले निर्माल्य कुजल्यानेही पाण्याला उग्र दुर्गंध येतो, शिवाय चवही खराब लागते.

अंबा नदीचे पाणी थेट नळाद्वारे नागरिकांना वितरित केले जाते. या पाण्यावर कोणतेही शुद्धीकरण व क्लोरिनेशनची प्रक्रिया केली जात नाही. पाली हे अष्टविनायक क्षेत्र असून, बल्‍लाळेश्‍वराच्या दर्शनासाठी दररोज हजारो भाविक येतात. पालीतील स्थायी लोकसंख्याही १५ हजारांहून अधिक आहे. अशा परिस्थितीत भाविक व नागरिकांना नाइलाजाने गढूळ व दूषित पाणी प्यावे व वापरावे लागत आहे. आतापर्यंत नळांतून चक्क जिवंत साप, खुबे, शिंपले, मासे आणि किडे बाहेर आले आहेत. गाळ, चिखल आणि शेवाळ येणे नेहमीचेच आहे. पाली शहरासाठी प्रस्‍तावित करण्यात आलेली २७ कोटी रुपयांची शुद्ध पाणीपुरवठा योजना अनेक वर्षांपासून लालफितीत अडकली आहे.

जलवाहिन्या जुन्या झाल्‍याने आतून गंजल्‍या आहेत. त्यांची दुरुस्ती करणे अवघड जाते. शिवाय, अनेक जलवाहिन्यांमध्ये कचरा, शेवाळ साचले आहे. पाणीपुरवठा सुरू केल्यावर कचरा, शेवाळे, माती नळाद्वारे घराघरांत जाते. शहरातील शुद्ध पाणी योजना लवकर कार्यान्वित व्हावी, यासाठी प्रयत्न सुरू आहोत.
- प्रणाली सूरज शेळके, नगराध्यक्षा, पाली

जलवाहिनी गंजली असून, काही ठिकाणी फुटली आहे. खडकाळी येथे गटाराचे काम सुरू असल्यामुळे नळाला काळे पाणी येत होते, मात्र दुरुस्‍ती केल्‍याने तसेच उन्हेरे धरणाचे पाणी अंबा नदीला सोडल्यामुळे स्वच्छ पुरवठा होईल. नागरिकांनी पाणी गाळून व उकळून प्यावे.
- प्रतीक्षा सुबोध पालांडे, पाणीपुरवठा व आरोग्य सभापती, पाली

नळाला अतिशय दूषित, दुर्गंधीयुक्त व काळे पाणी येत आहे. पूर्ण शहरातच दूषित व दुर्गंधीयुक्त पाण्याचा पुरवठा होत असल्‍याने नागरिकांचे आरोग्य धोक्यात आले आहे. नागरिकांना शुद्ध पाणी पोहोचवण्यासाठी प्रशासनाने प्रयत्न करावेत.
- महेश बारमुख, शिक्षक, नागरिक, पाली

पाली ः नळाद्वारे दूषित पाण्याचा पुरवठा होत आहे.