पाली-खोपोली राज्यमार्गावर खड्ड्यात वृक्षारोपण
सुधागडवासीयांचा आक्रोश; हातात फलक घेऊन प्रशासनाचे वेधले लक्ष

पाली, ता. १९ (वार्ताहर) ः पाली-खोपोली राज्यमहामार्गवरील धोकादायक व जीवघेण्या खड्ड्यांत नागरिकांनी शनिवारी (ता. १९) वृक्षारोपण करून आंदोलन केले. हातात फलक घेऊन जोरदार घोषणाबाजी करीत नागरिकांनी संताप व्यक्‍त करीत प्रशासनाचे लक्ष वेधले.
पाली-सुधागड संघर्ष संस्था व नागरिकांनी पाली शहरात तसेच पाली-खोपोली राज्य महामार्गावरील खड्डे यासंदर्भात अर्ज व आंदोलनाद्वारे प्रशासनाचे लक्ष वेधले आहे; मात्र ही समस्या सोडवली जात नसल्याने नागरिक संतप्त झाले होते. शनिवारी सर्व खड्ड्यांत वृक्षारोपण आंदोलन केले जाईल, असे निवेदन संघर्ष संस्थेच्या वतीने देण्यात आले होते. त्या अनुषंगाने पाली नगर पंचायतीने लागलीच पालीतील खड्डे भरण्यास सुरुवात केली आहे; मात्र एमएसआरडीसीने पाली-खोपोली राज्य महामार्गावरील खड्डे न भरल्‍याने नागरिकांनी याठिकाणी आंदोलन केले. लवकरात लवकर खड्ड्यांची डागडुजी न केल्‍यास तीव्र आंदोलन करण्यात येईल, असा इशाराही नागरिकांकडून देण्यात आला आहे. यासंदर्भात एमएसआरडीसीचे कार्यकारी अभियंत्‍यांशी संपर्क साधला असता होऊ शकला नाही.

पाली शहारात असलेले खड्डे बुजवण्याचे काम सुरू केले आहे. जे मोठे खड्डे होते, त्यांना सिमेंट काँक्रीटने योग्य प्रकारे भरण्यात आले आहेत. त्यामुळे नागरिकांचे समाधान झाले आहे; मात्र पाली-खोपोली राज्य महामार्गावर असलेले खड्डे भरण्याचे काम आमच्या अखत्यारित येत नाही.
- सुलतान बेनसेकर, बांधकाम सभापती, नगर पंचायत पाली

पाली ः राज्य महामार्गावरील खड्ड्यांमध्ये झाडे लावण्यात आली आहेत.