अलिबाग, ता. २४ (वार्ताहर)ः जन्माला आलेले एकही मूल शिक्षणापासून वंचित राहू नये, यासाठी रायगड जिल्हा परिषदेने शोधमोहीम राबवली होती. या मोहिमेत १४३ शाळाबाह्य, २०४ स्थलांतरित मुलांना शिक्षणाच्या प्रवाहात आणण्यात यश आले आहे.
शाळाबाह्य मुलांच्या सर्वेक्षणासाठी जिल्ह्यातील विविध ठिकाणी १ जुलै ते १५ जुलै यादरम्यान मोहीम राबविण्यात आली. या मोहिमेत घरोघरी, बसस्थानक, रेल्वेस्थानक, बाजारपेठ, वीटभट्ट्या, दगडखाणी, साखर कारखाने, स्थलांतरित कुटुंबे, जिल्ह्यातील सर्व खेडी, गाव, वाडी, तांडे, पाडे, शेतमळे, जंगल, बालगृह, निरीक्षण गृह, विशेष दत्तक संस्थांना भेटी देताना शाळाबाह्य, स्थलांतरित विद्यार्थ्यांचा शोध घेण्यात आला. जिल्हा परिषदेच्या मुख्य कार्यकारी अधिकारी नेहा भोसले, प्राथमिक शिक्षण अधिकारी ललिता दहितुले यांच्या मार्गदर्शनाखाली ही मोहीम राबविण्यात आली. या शोध मोहिमेत १४३ शाळाबाह्य मुले तर रायगड जिल्ह्यात स्थलांतरित झालेल्या २०४ मुलांना जिल्हा परिषद शाळेत प्रवेश देण्यात आला आहे.
----------------------------------------------
रायगड जिल्ह्यात प्राथमिक समग्र शिक्षा कार्यक्रम तसेच प्रगत शैक्षणिक महाराष्ट्र अंतर्गत ज्ञानरचनावादी शाळा, कृतीयुक्त अध्ययन पद्धती, डिजिटल शाळा, आयएसओ मानांकन, मोफत पाठ्यपुस्तक, मोफत गणवेश, माध्यान्ह भोजन, शिष्यवृत्ती शिष्यवृत्ती परीक्षा तयारी, नवोदय परीक्षा तयारी अशा उपक्रमांची अंमलबजावणी तज्ज्ञ शिक्षकांमार्फत शाळांमध्ये सुरू आहे.
------------------------------
शाळाबाह्य : १४३
७७ मुले, ६६ मुली
---------------------------------
स्थलांतरित : २०४
१०५ मुले, ९९ मुली
--------------------------------------
शाळाबाह्य मुलांच्या शोधमोहिमेअंतर्गत तीन ते सहा वयोगटातील बालके एकात्मिक बालविकास योजनेचा लाभ घेत नाहीत. तसेच खासगी बालवाडी, इंग्रजी माध्यमांचे ज्युनियर केजी, सीनियर केजीमध्ये जात नाहीत. त्यामुळे ही मोहीम राबविण्यात आली.
- नेहा भोसले, जि. प. मुख्य कार्यकारी अधिकारी
------------------------------
शासनाच्या अनेक योजना सुरू असतानाही अद्याप काही बालके शाळाबाह्य असल्याचे निदर्शनास येत आहे. अशा बालकांना शिक्षणाच्या प्रवाहात आणण्यासाठी शाळाबाह्य मुलांची शोधमोहीम राबवण्यात आली.
- ललिता दहितुले, प्राथमिक शिक्षणाधिकारी, राजिप
------------------------------------------------------------

\