वारंवार खंडित होणाऱ्या वीज पुरवठ्यामुळे मनसे आक्रमक
पाली, ता. १२ (वार्ताहर) ः सुधागड तालुक्यात वारंवार खंडित होणाऱ्या वीजपुरवठ्यामुळे नागरिक, व्यावसायिक आणि विद्यार्थ्यांचे मोठे हाल होत आहेत. यामुळे असंतोष वाढला असून, वीज वितरण विभागाने तातडीने पुरवठा सुरळीत न केल्यास आंदोलन छेडण्याचा इशारा महाराष्ट्र नवनिर्माण सेनेने दिला आहे. नुकतेच मनसेच्या तालुका अध्यक्ष सुनील साठे यांच्या नेतृत्वाखाली पाली वीज वितरण कार्यालयात निवेदन देण्यात आले.
या निवेदन म्हंटले आहे की, सतत खंडित होणाऱ्या वीज पुरवठ्यामुळे नागरिकांना त्रास सहन करावा लागत आहे. कुठलेही ठोस कारण नसतांना हकनाक विजपुरवठा खंडित केला जातो. शिवाय याबाबत महावितरणकडून योग्य माहितीदेखील दिली जात नाही. हातोंड, गोंदाव व माठळ येथे पडलेला दरोडा पाहता सुधागड तालुक्यात भीतीचे वातावरण आहे. सतत वीज पुरवठा खंडित होत असल्यामुळे अनेकांची इलेक्ट्रिक उपकरणे खराब होत आहेत. तसेच अनेक व्यावसायिकांना फटका बसत आहे. विद्यार्थ्यांना अभ्यास करण्यात अडचण येत आहेत. म्हणून यावर ठोस उपाययोजना करावी, या संदर्भात कार्यकारी उप अभियंता चित्रे यांना निवेदन देण्यात आले. यावेळी मनसे तालुका अध्यक्ष सुनील साठे, उप तालुका अध्यक्ष केवल चव्हाण, चव्हाणवाडी शाखा अध्यक्ष परेश वनगले व महाराष्ट्र सैनिक उपस्थित होते.