आसुडाचे फटके मारून फोडली हंडी!
सुधागडच्या जांभूळपाड्यातील अनोखी, पारंपरिक प्रथा कायम
अमित गवळे : सकाळ वृत्तसेवा
पाली, ता. १६ : सुधागड तालुक्यातील जांभूळपाडा गावातील गोपाळकाल्याचा उत्सव यंदाही आगळ्यावेगळ्या पद्धतीने पार पडला. या गावात गोविंदाच्या अंगावर आसूड (चाबूक) फटके मारून दहीहंडी फोडण्याची पारंपरिक प्रथा आजही जपली जाते. शनिवारी (ता. १६) जोरदार पावसात गोविंद पथकांनी पारंपरिक वाद्यांच्या गजरात आणि पेहरावात मलखांबावर बांधलेली दहीहंडी फोडली. या वेळी गोविंदांना कान्होबाचे वारे येतात. त्यांची महिलांकडून पूजाअर्चा केली जाते आणि मग आसुडाचे फटके अंगावर घेत ते गावभर फिरतात.

जांभूळपाड्यातील ही प्रथा कधी सुरू झाली हे निश्चित सांगता येत नाही; मात्र ग्रामस्थांनी गेल्या अनेक पिढ्यांपासून ती जिवंत ठेवली आहे. ही परंपरा धार्मिक भावनेने, समर्पणाने व परंपरेच्या निष्ठेने आजही जपली जाते. जांभूळपाड्यासह सुधागड तालुक्यातील पाली, परळी, पेडली या गावांमध्ये गोपाळकाल्याचा उत्सव पारंपरिक पद्धतीने साजरा करण्यात आला. आदिवासी वाड्या-पाड्यांवरही मोठ्या उत्साहात दहीहंड्या फोडण्यात आल्या.
गोविंदा पथकांनी गावागावात फिरून फळांचा प्रसाद घेत व अंगावर पाणी ओतून स्वागताचा अनुभव घेत कृष्णजन्माचा आनंद द्विगुणित केला.

पावसाने वाढवला उत्सवाचा आनंद
मुसळधार पावसामुळे काही ठिकाणी हंडी फोडण्याचा अनुभव अधिक रोमांचकारी झाला. चिखलामुळे थर कोसळल्यास गंभीर दुखापत होण्याची शक्यता कमी असल्यामुळे गोविंदांनी अधिक बिनधास्तपणे सहभाग घेतला.