रायगडमध्ये ४० हून अधिक गोविंदा जखमी
कर्जत, ता. १७ (बातमीदार): रायगड जिल्ह्यात पार पडलेल्या दहीहंडी उत्सवात गोविंदांच्या उत्साहात थर रचण्याच्या प्रयत्नात झालेल्या अपघातांमध्ये आतापर्यंत ४० हून अधिक गोविंदा जखमी झाले आहेत. अलिबाग तालुक्यात सहा गोविंदा किरकोळ जखमी झाले असून, संपूर्ण जिल्ह्यात जखमींची संख्या ४० हून अधिक झाली आहे. जिल्हा पोलिस नियंत्रण कक्षाने दिलेल्या माहितीनुसार, सुदैवाने या अपघातांत कोणतीही जीवितहानी झाली नाही.

कर्जतमधील १५ वर्षीय ध्रुव मनोज गुप्ता याला पाचव्या थरावरून पडल्याने गंभीर दुखापत झाली; मात्र वैद्यकीय चाचण्यांनंतर त्याची प्रकृती स्थिर असल्याचे समोर आले आहे. कर्जत शहरातील पाटील आळी मित्र मंडळ हे गोविंदा पथक उत्सवात सहभागी झाले होते. दुपारी साडेबारा वाजताच्या सुमारास कदम वाड्यासमोर दहीहंडी फोडताना ध्रुव हा पाचव्या थरावरून थेट काँक्रीट रस्त्यावर पडला. तत्काळ त्याला कर्जत उपजिल्हा रुग्णालयात नेण्यात आले व नंतर पुढील उपचारांसाठी पनवेल येथील गांधी रुग्णालयात हलवण्यात आले. सायंकाळी उशिरा करण्यात आलेल्या एमआरआय व सीटी स्कॅन अहवाल सामान्य आल्यामुळे त्याच्या कुटुंबीयांनी सुटकेचा नि:श्वास सोडला. या अपघाताच्या पार्श्वभूमीवर पथकाच्या सदस्यांनी एक भावनिक आणि आदर्श निर्णय घेतला आहे.

पथकाचे सदस्य प्रशांत चंदन पाटील यांनी दिलेल्या माहितीनुसार, यावर्षी पथकाने दहीहंडी स्पर्धेत जिंकलेली संपूर्ण पारितोषिकाची रक्कम (सुमारे एक लाख रुपये) ध्रुवच्या पुढील उपचारासाठी दिली जाणार आहे. उत्सवाच्या गडबडीतही पथकाने दाखवलेली ही सामाजिक बांधिलकी आणि एकजूट शहरात कौतुकाचा विषय ठरत आहे.