संघकीर्ती महाथेरो यांच्या स्मृती स्मारकास श्रीलंकेतील बौद्ध भंतेंची भेट
पाली, ता. २६ (वार्ताहर) ः रायगड जिल्ह्यातील प्रथम बौद्ध भिक्खू, भंते संघकीर्ती महाथेरो यांच्या मूळ गावी उत्कर्षनगर, झाप, पाली, ता. सुधागड येथील स्मृती स्मारकास नुकतीच श्रीलंकेतील बौद्ध भंतेंनी ऐतिहासिक भेट दिली.
भंते आनंद महाथेरो (श्रीलंका), भंते अनिरुद्ध थेरो (श्रीलंका), भंते आधीचित्तो (कर्जत) व भंते आर्यधम्म (श्रामनेर) यांनी ऐतिहासिक भेट दिली. या वेळी श्रीलंकेचे भंते आनंद महाथरो यांनी धम्म देसना दिली, तथागत बुद्ध हे खूप महान आहेत. त्यांचा जन्म भारत देशातला असल्याने आमच्यासाठी ही भारतभूमी महान असून, वंदनीय आहे. डॉ. भीमराव आंबेडकर हेसुद्धा महान आहेत. जगदंवंदनीय आहेत. तथागत बुद्ध आणि डॉ. आंबेडकर यांच्या विचारावर प्रत्यक्ष अनुकरण करणारे या गावात जन्मास आलेले भंते संघकीर्ती महाथरोदेखील महान ठरतात. त्यांच्या २५ वर्षांचा धम्म जीवन प्रवास त्यांना महान बनवितात, असे आनंद महाथेरो म्हणाले. अतिशय प्रतिकूल परिस्थितीत संघर्ष करत कोंडीराम भालेराव यांनी भंते होण्यापर्यंतचा प्रवास हा ऐतिहासिक नोंद ठेवणारा ठरला आहे. सुधागड तालुका बौद्धजन पंचायत ही संस्था निर्माण करण्यासाठी त्यांचे अमूल्य योगदान राहिले आहे. त्यांची महती श्रीलंकेतील बौद्ध भंतेजीपर्यंत विश्वशांती बुद्ध विहार, अलिबागच्या माध्यमातून पोहोचल्याने या भिक्खू संघाने झाप येथील भंते संघकीर्ती महाथेरो यांच्या स्मृतिस्थळास भेट दिली. या वेळी भंते आधीचीत्तो, कर्जत यांनीदेखील उपस्थिताना धम्म देसना दिली.